ტერორისტულ ქსელ ალ-ყაიდის დამფუძნებლის, ოსამა ბინ ლადენის ვაჟს, ომარს, აუკრძალეს დაბრუნება საფრანგეთში, საიდანაც მისი დეპორტაცია მოხდა, რადგან, როგორც ამტკიცებენ, სოციალურ ქსელებში ტერორიზმის განდიდების შემცველი პუბლიკაციები გაავრცელა. ამ ინფორმაციას აქვეყნებს Reuters-ი. ომარ ბინ ლადენის საფრანგეთში დაბრუნების აკრძალვის განკარგულებას ხელი მოაწერა საფრანგეთის შინაგან საქმეთა მინისტრმა ბრუნო რეტაიომ. მან ასევე განაცხადა, რომ ომარი ადრე იყო დეპორტირებული. საფრანგეთის შინაგან საქმეთა მინისტრს არ დაუზუსტებია, სად იმყოფება ომარ ბინ ლადენი. „ბატონმა ბინ ლადენმა, რომელიც ორნის რეგიონში ცხოვრობდა, როგორც ბრიტანეთის მოქალაქის ქმარი, 2023 წელს სოციალურ ქსელებში გამოაქვეყნა კომენტარები, რომლებიც განადიდებდა ტერორიზმს. ადმინისტრაციული აკრძალვა იძლევა გარანტიას, რომ ბატონი ბინ ლადენი საფრანგეთში დაბრუნებას ვერ შეძლებს“, - დაწერა რეტაიომ სოციალურ ქსელ Х-ში. Reuters-ი წერს, რომ ომარ ბინ ლადენი წლების განმავალობაში ცხოვრობდა ნორმანდიაში და პეიზაჟების ხატვით იყო დაკავებული. ადგილობრივი ყოველკვირეული გაზეთის, Le Publicateur Libre-ს თანახმად, მან ადგილობრივი ხელისუფლების ყურადღება მიიქცია, როცა სოციალურ ქსელში გამოაქვეყნა პოსტი მამამისის, აშშ-ის სპეცრაზმის მიერ 2011 წელს მოკლული ოსამა ბინ ლადენის შესახებ. Reuters-მა სოციალურ ქსელში ვერ მიაკვლია ომარ ბინ ლადენის პოსტს და პირადად მასაც ვერ დაუკავშირდა კომენტარისთვის. ასევე ნახეთ გავრცელდა ბინ ლადენის წერილი შვილებისადმი ...