გაერო, ევროპის უსაფრთხოებისა და თანამშრომლობის ორგანიზაცია(ეუთო) და ევროკავშირი ჟენევის დისკუსიების სხვა ქვეყანაში გადატანას ეწინააღმდეგებიან. ამის შესახებ ცხინვალში ჟურნალისტებს განუცხადა გაეროს დისკუსიების თანათავმჯდომარემ, ჯიჰან სულთანოღლუმ. "ჟენევის დისკუსიები, თავისი განმარტებით და დამფუძნებელი დოკუმენტების მიხედვით, ჟენევაში უნდა იმართებოდეს. აქედან გამომდინარე, სამივე ორგანიზაცია, რომლებიც თანათავმჯდომარეებს წარმოადგენენ - გაერო, ეუთო და ევროკავშირი - მხარს დაუჭერენ ჟენევას, როგორც [შეხვედრების] ადგილის შენარჩუნებას", - განაცხადა სულთანოღლუმ. მისი სიტყვებით, ჟენევის დისკუსიების გადატანის შესახებ გადაწყვეტილება მხოლოდ მონაწილეთა შორის კონსენსუსის გზით უნდა მიიღწეს და ამ ეტაპზე ამის წინაპირობები არ არსებობს. ჟენევის დისკუსიების მორიგი, 62-ე რაუნდი, 5-6 ნოემბერს უნდა გაიმართოს. ჟენევის დისკუსიების თანათავმჯდომარეები ცხინვალში ოკუპირებული სამხრეთ ოსეთის დელეგაციის ხელმძღვანელმა კონსტანტინ კოჩიევმა თანათავმჯდომარეებთან შეხვედრაზე განაცხადა, რომ ჟენევის შეხვედრები „სასარგებლო სამუშაო მექანიზმია, რომელსაც მნიშვნელოვანი წვლილი შეაქვს სტაბილურობის უზრუნველყოფის გამტკიცებაში“. მისი თქმით, ჟენევის დისკუსიების მომავალი რაუნდისთვის „არანაირი დაბრკოლება და სირთულე " არ არსებობს. "მხოლოდ ჟენევის ფორმატშია შესაძლებელი ჩვენი დღის წესრიგის ყველაზე არსებით, ძირითად საკითხებზე მუშაობის გაგრძელება, როგორიცაა მიდგომების განსაზღვრა და, საბოლოოდ, ძალის გამოუყენებლობის დოკუმენტზე მუშაობა და საზღვრის დელიმიტაცია და დემარკაცია", - თქვა კოჩიევმა. 7 ოქტომბერს ჟენევის დისკუსიების თანათავმჯდომარეებს თბილისში საგარეო საქმეთა მინისტრის მოადგილე ლაშა დარსალიამ უმასპინძლა. „შეხვედრაზე ხაზი გაესვა ჟენევის საერთაშორისო მოლაპარაკებების ეფექტიანი ფუნქციონირების მნიშვნელობას და, ამ კონტექსტში, აქცენტი გაკეთდა ჟენევის საერთაშორისო მოლაპარაკებების დღის წესრიგის მთავარი საკითხების - რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულებისა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების მიმართულებით წინსვლის საჭიროებაზე", - ნათქვამია საქართველოს საგარეო საქმეთა სამინისტროს მიერ გავრცელებულ ინფორმაციაში, რომელშიც ასევე ვკითხულობთ, რომ შეხვედრაზე ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის შეხვედრების რეგულარულად, ფუძემდებლური პრინციპების შესაბამისად გამართვის მნიშვნელობას. ჟენევის დისკუსიების თანათავმჯდომარეებ...