„მას შემდეგ, რაც ისრაელმა უცხოელ ჟურნალისტებს ღაზაზე დამოუკიდებელი წვდომა აუკრძალა, პალესტინელი ჟურნალისტები, რომელთა შორის ბევრი ქალია, პრაქტიკულად ღაზის სექტორიდან ერთადერთ ხმად და ცნობების ერთადერთ წყაროდ იქცნენ,“ აღნიშნავს RAW in WAR, რომელიც ქალებს ეხმარება კონფლიქტის ზონებში. ორგანიზაცია აღნიშნავს ყველა პალესტინელი ჟურნალისტის სიმამაცეს, რომლებიც, სიცოცხლისთვის საფრთხის მიუხედავად, „ცდილობენ, პატიოსნად გააშუქონ მოვლენები მიმდინარე კონფლიქტის პირობებში“. ღაზაში ომის ერთი წლის განმავლობაში 150-ზე მეტი ჟურნალისტი და მედიის თანამშრომელი დაიღუპა, ნათქვამია RAW in WAR-ის პრესრელიზში. დაღუპული მედიის მუშაკების რაოდენობა ზუსტად არ არის ცნობილი და მერყეობს 139-დან (ჟურნალისტთა საერთაშორისო ფედერაციის შეფასებით) 175-მდე (პალესტინის მხარის მონაცემებით). 2024 წლის თებერვალში გაეროს ექსპერტებმა ღაზის კონფლიქტს უწოდეს „უახლეს ისტორიაში ჟურნალისტებისთვის ყველაზე მომაკვდინებელი და ყველაზე საშიში“. პალესტინელ ჟურნალისტებს ჯილდო გადაეცემათ ფესტივალზე „მსოფლიოს ქალები“, რომელიც 2025 წლის მარტში გაიმართება. ასევე ნახეთ ისრაელის დამანგრეველი ომი ღაზაში - რიცხვები და სტატისტიკა ისრაელი ღაზის სექტორში სამხედრო ოპერაციას ახორციელებს მას შემდეგ, რაც 2023 წლის 7 ოქტომბერს ქვეყნის სამხრეთს თავს დაესხა რადიკალური პალესტინური დაჯგუფება ჰამასი, რომელიც აშშ-სა და ევროკავშირში ტერორისტულ ორგანიზაციად არის აღიარებული. ჰამასის თავდასხმის შედეგად ისრაელში 1200-ზე მეტი ადამიანი დაიღუპა, 250-ზე მეტი ტყვედ ჩავარდა და ისინი ღაზაში გადაიყვანეს. ზოგიერთი დღემდე მძევლად რჩება. ისრაელი აცხადებს, რომ მისი მიზანია ჰამასის სრული განადგურება. საერთაშორისო თანამეგობრობის ნაწილი ისრაელს ღაზაში პალესტინელი მშვიდობიანი მოსახლეობის განადგურებაში ადანაშაულებს. ჰამასის მიერ კონტროლირებადი ღაზის ჯანდაცვის სამინისტროს ცნობით, ისრაელის დაბომბვას 41 000-ზე მეტი პალესტინელი შეეწირა, ძირითადად ქალები და ბავშვები. ისრაელის სამხედროები აცხადებენ, რომ მათი სამიზნეა მხოლოდ და მხოლოდ ჰამასის ინფრასტრუქტურა და ამტკიცებენ, რომ ჰამასი თავის ობიექტებს მჭიდროდ დასახლებულ რაიონებში ათავსებს და სამოქალაქო პირებს ცოცხალ ფარად იყენებს. ...