9 ოქტომბერს, შუაღამის შემდეგ, აფეთქებები იყო რუსეთის კრასნოდარის მხარის ქალაქ ეისკის რაიონში. ადგილობრივი ტელეგრამ-არხების ცნობით, ეისკზე უპილოტო საფრენი აპარატებით შეტევა იყო. ამ რაიონში საჰაერო თავდაცვის სისტემის ამოქმედების შესახებ ადგილობრივ სადისპეტჩერო სამსახურზე დაყრდნობით წერდა კრემლის მიერ კონტროლირებული სააგენტო „რია ნოვოსტიც“. ეისკი აზოვის ზღვის ნაპირზე მდებარეობს. ქალაქში განთავსებულია რუსეთის შეიარაღებული ძალების აეროდრომი, რომელიც არაერთხელ იყო უკრაინული დრონებით შეტევის სამიზნე. კრასნოდარის მხარის გუბერნატორმა ვენიამინ კონდრატიევმა ტელეგრამ-არხზე ღამის სამი საათისთვის გამოქვეყნებული ცნობით დაადასტურა უპილოტო საფრენი აპარატებით შეტევა, თუმცა ეისკი არ უხსენებია. კონდრატიევის თანახმად, დრონების ნამსხვრევებმა შჩერბინოვკის რაიონში დააზიანა კერძო სახლი და გაზსადენი და გამოიწვია ხანძარი, რომელიც უკვე ლიკვიდირებულია. ასევე ნახეთ რუსულმა „პანცირმა“ ფეოდოსიის ნავთობტერმინალი უკრაინული დრონებისგან ვერ დაიცვა უკრაინული დრონებით შეტევის შესახებ იუწყებიან რუსეთის სხვა რეგიონებიდანაც. როსტოვის ოლქის გუბერნატორ ვასილი გოლუბევის თანახმად, ღამის განმავლობაში ჩამოაგდეს 10 უპილოტო საფრენი აპარატი, მათ შორის ნოვოშახტინსკის რაიონში. ქალაქ ნოვოშახტინსკში მდებარეობს ნავთობგადამამუშავებელი ქარხანა, რომელზეც ბოლო თვეებში დრონებით არაერთი შეტევა იყო. გუბერნატორი გოლუბევი დღევანდელი შეტევის კონკრეტულ სამიზნეებს არ ასახელებს და იუწყება „ლანდშაფტური ხანძრის“ შესახებ, რომელიც „ოპერატიულად ჩააქრეს“. რუსეთის ბრიანსკის ოლქის გუბერნატორ ალექსანდრ ბოგომაზის თანახმად, ღამის განმავლობაში რეგიონში ჩამოაგდეს 12 უკრაინული დრონი. სხვა წყაროებით ეს ცნობები ჯერჯერობით დადასტურებული არ არის. უკრაინას, რომელიც ორ წელზე მეტია რუსეთის სამხედრო აგრესიას ებრძვის, რუსეთის ტერიტორიაზე სამიზნედ აქვს გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ. ...