ბელარუსის ავტორიტარმა ლიდერმა ალიაქსანდრ ლუკაშენკამ მოსკოვში სამიტზე განაცხადა, რომ ისურვებდა „დსთ-ს ოჯახის“ აღდგენას მისი ყოფილი შემადგენლობით. „კარგი იქნებოდა, ჩვენს ოჯახს საქართველო რომ დაჰბრუნებოდა, აღედგინა თავისი სრულფორმატიანი მონაწილეობა მოლდოვას, გონს მოგებულიყო უკრაინის ხელისუფლება, ნორმალური ცხოვრების აღსადგენად, რომელში მონაწილეობაც მოგვიწევს. აბსოლუტურად დარწმუნებული ვარ, რომ ასეც იქნება. უბრალოდ ეს დროის საკითხია“, - ციტირებს ლუკაშენკას სიტყვებს სააგენტო "ბელტა". ლუკაშენკამ ხაზი გაუსვა, რომ ქვეყნები უნდა უფრთხილდებოდნენ იმას, რაც აქვთ თანამეგობრობაში. "ყველა, ვინც არ მოწყდა ჩვენს თანამეგობრობას, დღეს ღირსეულ შედეგებს აჩვენებს. მათ არ დაუკარგავთ თავისი ქვეყნის მართვა, ისინი რჩებიან საერთაშორისო ურთიერთობების სრულფასოვან სუბიექტებად", - განაცხადა ლუკაშენკამ. მანამდე ლუკაშენკას ნათქვამი აქვს, რომ საქართველო „გაძღა“ დასავლეთის დაპირებებით და მისი კურსი იცვლება. „მაგალითად, საქართველო. ხედავთ მისი პოლიტიკის ცვლილებას. ისინი გაძღნენ დასავლური დაპირებებით და სხვა და ისევ ჩვენს ბაზარზე დაბრუნება სურთ. იმიტომ რომ არც რძით, არც ხორცით და არც ღვინით თავის ბაზარზე არ შეგიშვებენ", - თქვა 2023 წელს ლუკაშენკამ. საქართველოს ხელისუფლება, რუსეთთან პოზიციების დაახლოების მიუხედავად, აცხადებს, რომ მათი მიზანი 2030 წლისთვის ევროკავშირში გაწევრიანებაა. საქართველომ დსთ-დან გასვლა 2008 წლის ომის შემდეგ გადაწყვიტა. მისი წევრობა ოფიციალურად 2009 წლის 18 აგვისტოს შეწყდა. ...