გამოცემა „უკრაინსკა პრავდის“ რედაქცია თავის საქმიანობაში საფრთხის შემცველად მიიჩნევს "ხანგრძლივ და სისტემურ ზეწოლას", რომელსაც პრეზიდენტის ოფისი ახორციელებს რედაქციასა და ცალკეულ ჟურნალისტებზე, - ნათქვამია 8 ოქტომბერს გავრცელებულ განცხადებაში, რომლის შინაარსსაც რადიო თავისუფლების უკრაინული სამსახური გაეცნო. გამოცემა მიიჩნევს, რომ რედაქციის მიმართ ასეთ ქმედებებში უშუალოდ პრეზიდენტ ზელენსკის აპარატია ჩართული - კერძოდ, პრეზიდენტის ოფისი თავის სპიკერებს უკრძალავს გამოცემის ჟურნალისტებთან კომუნიკაციას და ხდება ზეწოლა ბიზნესზე, რათა შეწყდეს სარეკლამო თანამშრომლობა „უკრაინსკა პრავდასთან“. ზეწოლის მაგალითად გამოცემას მოჰყავს ასევე ღიად ემოციური კომუნიკაცია პრეზიდენტ ზელენსკისა და „უკრაინსკა პრავდის“ ჟურნალისტ რომან კრავეცს შორის, რომელიც საზოგადოებამ ცოტა ხნის წინ (საუბარია უკრაინის პრეზიდენტის 27 აგვისტოს პრესკონფერენციაზე - რედ.) პირდაპირ ეთერში იხილა. „ეს და სხვა არასაჯარო სიგნალები მიუთითებს ჩვენს სარედაქციო პოლიტიკაზე გავლენის მოხდენის მცდელობებზე. ამის გაცნობიერება განსაკუთრებით აღმაშფოთებელია რუსეთის მიერ უკრაინაში სრულმასშტაბიანი შეჭრის დროს, როდესაც გადაუდებლად საჭიროა ჩვენი საერთო ბრძოლა როგორც გადარჩენისთვის, ასევე დემოკრატიული ღირებულებებისთვის", - ნათქვამია „უკრაინსკა პრავდის“ განცხადებაში. რედაქცია აღნიშნავს, რომ საჯაროდ გაშუქდება და საერთაშორისო დონეზე ექნება შედეგები უკრაინის პრეზიდენტის აპარატის კონკრეტული თანამდებობის პირების ყველა მცდელობას, გავლენა მოახდინონ გამოცემის ჟურნალისტებზე. "უკრაინსკა პრავდის" განცხადებაზე პრეზიდენტის აპარატს კომენტარი არ გაუკეთებია. „უკრაინსკა პრავდა“ არის უკრაინული ონლაინგამოცემა, რომელიც 2000 წლის აპრილში გიორგი ღონღაძემ დააარსა. ღონღაძის დაღუპვის შემდეგ (2000 წლის სექტემბერი) რედაქციას ხელმძღვანელობდა გამოცემის თანადამფუძნებელი ელენა პრიტულა, ხოლო 2014 წელს მთავარ რედაქტორად სევგილ მუსაევა დაინიშნა. 2021 წლის მაისში, გამოცემის ახალი მფლობელი გახდა ჩეხი ბიზნესმენი ტომას ფიალა, კომპანია Dragon Capital-ის აღმასრულებელი დირექტორი. ასევე ნახეთ ხალხი პროპაგანდასთან პირისპირ არ უნდა დავტოვოთ - ბომბსაფარში მოსმენილი უკრაინელი ჟურნალისტების ამბები ...