ისრაელის იერიშის შედეგად ღაზის სექტორის ჩრდილოეთ და ცენტრალურ ნაწილებში დაიღუპა 12 პალესტინელი, მათ შორის, ერთი ოჯახის 9 წევრი. ამის შესახებ პალესტინის ავტონომიის ოფიციალურმა საინფორმაციო სააგენტო WAFA-მ განაცხადა 9 ოქტომბერს. WAFA პალესტინის ნახევარმთვარეზე დაყრდნობით იუწყება, რომ ჩრდილოეთ ღაზაში, სეჯაიას რაიონში, ერთი ოჯახის 9 წევრი დაიღუპა, როდესაც მათი საცხოვრებელი ბინა დაიბომბა. ამავე დროს ცენტრალურ ღაზაში მდებარე ნუსეირატის ლტოლვილთა ბანაკზე ისრაელის იერიშის შედეგად დაიღუპა კიდევ სამი ადამიანი, მათ შორის ერთი ბავშვი. დაჭრილია რამდენიმე ადამიანი. ასევე ნახეთ ისრაელის დამანგრეველი ომი ღაზაში - რიცხვები და სტატისტიკა ისრაელი ღაზის სექტორში სამხედრო ოპერაციას ახორციელებს მას შემდეგ, რაც 2023 წლის 7 ოქტომბერს ქვეყნის სამხრეთს თავს დაესხა რადიკალური პალესტინური დაჯგუფება ჰამასი, რომელიც აშშ-სა და ევროკავშირში ტერორისტულ ორგანიზაციად არის აღიარებული. ჰამასის თავდასხმის შედეგად ისრაელში 1200-ზე მეტი ადამიანი დაიღუპა, 250-ზე მეტი ტყვედ ჩავარდა და ისინი ღაზაში გადაიყვანეს. ზოგიერთი დღემდე მძევლად რჩება. ისრაელი აცხადებს, რომ მისი მიზანია ჰამასის სრული განადგურება. საერთაშორისო თანამეგობრობის ნაწილი ისრაელს ღაზაში პალესტინელი მშვიდობიანი მოსახლეობის განადგურებაში ადანაშაულებს. ჰამასის მიერ კონტროლირებადი ღაზის ჯანდაცვის სამინისტროს ცნობით, ისრაელის დაბომბვას 41 000-ზე მეტი პალესტინელი შეეწირა, ძირითადად ქალები და ბავშვები. ისრაელის სამხედროები აცხადებენ, რომ მათი სამიზნეა მხოლოდ და მხოლოდ ჰამასის ინფრასტრუქტურა და ამტკიცებენ, რომ ჰამასი თავის ობიექტებს მჭიდროდ დასახლებულ რაიონებში ათავსებს და სამოქალაქო პირებს ცოცხალ ფარად იყენებს. ...