48
„იმედი“ განცხადებაში აღნიშნავს, რომ კანონი ტელევიზიებს საარჩევნო კლიპების არადასიკრიმინაციულად განთავსებას ავალდებულებს და ამ წესით ხელმძღვანელობდნენ გასული პერიოდის განმავლობაში. „მიუხედავად იმისა, რომ „ტელეიმედს“ აქვს მკაფიოდ გაცხადებული სარედაქციო პოლიტიკა - არ დაუშვას "ნაციონალური მოძრაობის" დაბრუნება ხელისუფლებაში, რაც ქვეყანას სრულ კატასტროფამდე მიიყვანს, ჩვენ დღემდე ვუშვებდით მათ მიერ მოწოდებულ ვიდეორგოლებს“, - წერია განცხადებაში. „იმედში“ რადიო თავისუფლებას უთხრეს, რომ „კოლექტიურ ნაციონალურ მოძრაობაში“ გულისხმობენ „ერთიანობა - ნაციონალური მოძრაობას“, „კოალიციას ცვლილებისთვის“, „ძლიერ საქართველოსა“ და პარტიას „საქართველოსთვის“. სწორედ ასე მოიხსენიებს ამ პარტიებს „ქართული ოცნებაც“. ტელეარხი სამ ოპოზიციურ პარტიას, რომლებსაც უფასო სარეკლამო დრო ეკუთვნით, უარს ეუბნება რეკლამის განთავსებაზე, რადგან „მთავარი არხი“, „TV პირველი“ და „ფორმულა“ ეთერში აღარ უშვებენ „ქართული ოცნების“ ვიდეოკლიპს ომისა და მშვიდობის შესახებ, რომელშიც ერთმანეთთანაა შედარებული უკრაინაში რუსეთის მიერ დაბომბილი შენობები და ტაძრები და საქართველოში "ქართული ოცნების" ხელისუფლების პირობებში რეაბილიტირებული თუ აშენებული ობიექტები. ასევე ნახეთ ომზე „ქართული ოცნების“ რეკლამის არგაშვების გამო „მთავარს“, „TV პირველსა“ და „ფორმულას“ ოქმი შეუდგინეს „ვიდრე არ აღმოიფხვრება ნაციონალური მოძრაობის მედიასაშუალებების მიერ შექმნილი დისბალანსი (რეიტინგების, მათ მიერ რეკლამის გაუშვებლობით გაცდენილი საათების და სხვა ობიექტური კრიტერიუმების გათვალისწინებით) და უზრუნველყოფილი არ იქნება კონკურენტული საარჩევნო გარემო ამ მიმართულებით, ეთერში აღარ განვათავსებთ კოლექტიური ნაციონალური მოძრაობის იმ პარტიების სარეკლამო ვიდეორგოლებს, რომლებიც წარმოადგენენ წინა ხელისუფლების დანაშაულებრივ სახეს“, - აცხადებენ „იმედში“. ...
