სულ მცირე 4 ადამიანი დაიღუპა და 10 დაიჭრა უკრაინის ოდესის ოლქზე რუსეთის მორიგი სარაკეტო შეტევის შედეგად. საოლქო-სამხედრო-ადმინისტრაციის ხელმძღვანელ ოლეგ კიპერის მიერ დღეს, 11 ოქტომბერს დილით გავრცელებული ინფორმაციით, ოდესის რაიონში რაკეტამ დაანგრია ორსართულიანი სახლი. დაღუპულებს შორის ერთი მოზარდია. ოქტომბრის დასაწყისიდან რუსეთის ჯარები ოდესის ოლქს რაკეტებით და დრონებით თითქმის ყოველდღე უტევენ. მთავარი სამიზნე საპორტო ინფრასტრუქტურაა. ასევე ნახეთ შვიდამდე გაიზარდა ოდესაზე სარაკეტო შეტევის შედეგად დაღუპულთა რიცხვი უკრაინის ვიცე-პრემიერმა ოლქსი კულებამ 10 ოქტომბერს განაცხადა, რომ გასულ სამ თვეში რუსეთის ჯარებმა 60-ჯერ შეუტიეს უკრაინის სამხრეთში მდებარე პორტებს. კულებას თანახმად, მიზანმიმართული დარტყმების ამოცანაა შემცირდეს უკრაინის საექსპორტო პოტენციალი და განზრახ შეიქმნას სასურსათო კრიზისი მსოფლიოს იმ ქვეყნებში, რომლებიც უშუალოდ უკრაინულ ხორბალზე არიან დამოკიდებული. ვიცე-პრემიერის მონაცემებით, ბოლო სამ თვეში რუსეთმა გაანადგურა, ან დააზიანა უკრაინის საპორტო ინფრასტრუქტურის 300-მდე ობიექტი, 177 სატრანსპოტო საშუალება და 22 სამოქალაქო გემი. ...