ევროკავშირმა გადადო მის ტერიტორიაზე ევროკავშირის არაწევრი ქვეყნების მოქალაქეების შესვლისთვის ბიომეტრიული შემოწმების ახალი სისტემის დანერგვა მას შემდეგ, რაც გერმანიამ, საფრანგეთმა და ნიდერლანდმა განაცხადეს, რომ სასაზღვრო კომპიუტერული სისტემები ჯერჯერობით არ არის მზად. ამის შესახებ Reuters-ი იუწყება. სისტემა არ ამუშავდება 10 ნოემბერს, როგორც ეს ადრე იყო დაგეგმილი, განუცხადა ჟურნალისტებს ევროკავშირის საშინაო საქმეთა კომისიის ხელმძღვანელმა ილვა იოჰანსონმა. ახალი გრაფიკი ჯერ არ არის, მაგრამ განიხილება ეტაპობრივი დანერგვის შესაძლებლობა, დასძინა მან. შესვლის/გასვლის სისტემა (EES) შექმნის ციფრულ ჩანაწერს, რომელიც სამგზავრო დოკუმენტს აკავშირებს პიროვნების დამადასტურებელ ბიომეტრიულ მონაცემებთან. ეს აუქმებს ევროკავშირის გარე საზღვარზე ბეჭდის ხელით ჩარტყმის აუცილებლობას. ამისათვის საჭიროა, რომ იმ ქვეყნების მოქალაქეებმა, რომლებიც არ შედიან ევროკავშირში, შენგენის თავისუფალი გადაადგილების ზონაში შესვლისას გაიარონ თითის ანაბეჭდების რეგისტრაცია, გაიარონ სახის სკანირება და პასუხი გასცენ შეკითხვებს ზონაში მათი ყოფნის თაობაზე. გერმანიის შინაგან საქმეთა სამინისტროს სპიკერმა თქვა, რომ სამი ქვეყანა, რომლებზეც მოდის მგზავრთა ნაკადის 40%, არ არის მზად EES-ის შემოსაღებად, ვინაიდან „ჯერ არ არის მიღწეული აუცილებელი სტაბილურობა და ფუნქციონირება“ ცენტრალური EES სისტემისა, რომელსაც უზრუნველყოფს ევროკავშირის IT-სისტემების დანერგვის სააგენტო. საფრანგეთის შინაგან საქმეთა სამინისტრომ განაცხადა, რომ მიუხედავად იმისა, რომ საფრანგეთი დარწმუნებულია EES-ის სარგებლიანობაში, მისი განხორციელება სათანადოდ უნდა იქნეს მომზადებული. EES-ის ამოქმედება დაგეგმილი იყო 2022 წლისთვის, მაგრამ არაერთხელ ჩაიშალა ტექნიკური პრობლემებისა და შენგენის ზონის ყველა საერთაშორისო სახმელეთო, საზღვაო და საჰაერო საზღვარზე ავტომატური ბარიერების დაყენების შეფერხების გამო. ადრე იტყობინებოდნენ, რომ ევროკავშირი შენგენის ზონის ქვეყნებში შესვლის ახალ წესებს 10 ნოემბრიდან შემოიღებს. პირველი შესვლისას მოქალაქეებს მოეთხოვებათ, წარმოადგინონ ბიომეტრიული მონაცემები: თითის ანაბეჭდები და სახის ფოტოები. მონაცემები სამი წლის განმავლობაში ინახება და საჭირო არ არის მათი განმეორებით ჩაბარება. ამ ზომებმა უნდა გააადვილოს საზღვრის გადაკვეთა, თავიდან აიცილოს ყალბი პასპორტების გამოყენება და ებრძოლოს არალეგალურ მიგრაციას. ასევე ნახეთ რა უნდა იცოდეთ ევროპაში წასვლის წინ 2023 წლიდან (გადაიდო 2025 წლამდე) - სისტემა ETIAS-ი ...