რვა წლის გოგოს გაუპატიურების ბრალდებით დაკავებულ თოთხმეტი წლის ბიჭს სამეგრელოს ერთ-ერთი მუნიციპალიტეტის სასამართლომ დღეს, 11 ოქტომბერს, 10 წლით თავისუფლების აღკვეთა მიუსაჯა. განაჩენს არ ეთანხმება დაკავებულის ოჯახი და საქმის გასაჩივრებას გეგმავს. სხდომა არასრულწლოვნის საუკეთესო ინტერესებიდან გამომდინარე დახურული იყო. სასამართლო კომენტარის გარეშე დატოვა ბრალდებულის ადვოკატმა და საქმის პროკურორმა. რადიო თავისუფლებასთან მოკლე კომენტარი გააკეთეს პროკურატურაშიც და დაადასტურეს მხოლოდ ის, რომ არასრულწლოვანს 10-წლიანი პატიმრობა შეეფარდა. 14 წლის ბიჭი 4 აპრილს დააკავეს. მას ბრალი საქართველოს სისხლის სამართლის კოდექსის 137-ე მუხლით წარედგინა, რაც გაუპატიურებას გულისხმობს. მოგვიანებით მას სასამართლომ აღკვეთის ღონისძიებად პატიმრობა შეუფარდა, თუმცა, როგორც ბრალდებულის ოჯახი ამბობს, 45 დღეში გირაოს სანაცვლოდ გაათავისუფლეს მისი ბრალეულობის დამადასტურებელი არასაკმარისი მტკიცებულებების გამო. არასრულწლოვნის დედის თქმით, გამამტყუნებელ განაჩენს არ მოელოდნენ: „თუ დამნაშავე იყო, გირაოთი რატომ გაათავისუფლეს 4 თვის წინ?! მაშინ გაათავისუფლეს, რადგან ექსპერტიზის პასუხებმა არ დაადასტურა, რომ გოგო გაუპატიურებული იყო. ექსპერტიზის ყველა პასუხი ჩვენს სასარგებლოდ იყო. ამის შემდეგ გაათავისუფლა ის სასამართლომ. დღეს კი დააკავეს უდანაშაულო ბავშვი და 10 წლით ჩასვეს ციხეში. ჩვენ ამას ასე არ დავტოვებთ და გავასაჩივრებთ... ჩემი შვილი ბრალს არ აღიარებს. სამხარაულის ექსპერტიზის პასუხებიც ამას ადასტურებს, რომ გოგო გაუპატიურებული კი არა, თითი არ არის დაკარებული“, - უთხრა რადიო თავისუფლებას დაკავებულის დედამ. მისი მტკიცებით, დაზარალებულის დედამ „პირადი ნაცნობობის და გამომძიებელთან ახლო ურთიერთობის“ დახმარებით მიაღწია მისთვის სასურველ სასამართლო განაჩენს. როგორც ბიჭის ოჯახი ირწმუნება, 8 წლის ბავშვის მშობლებმა თავადაც კარგად იციან მოზარდის უდანაშაულობის შესახებ, თუმცა მათი მიზანი დაზარალებულის სტატუსის მოპოვება იყო: „ესენი [გოგოს მშობლები] არიან უცხო ქვეყნის მოქალაქეები... შესაბამისად, თუ ისინი მიიღებენ დაზარალებულის სტატუსს, მათ თავიანთი ქვეყანა, როგორც დაზარალებულს, გადაუხდის 100 ათას ევროს. აი, ამისთვის გაწირეს ჩემი შვილი და ციხეში გაუშვეს უდანაშაულო ბავშვი“. საპირისპირო განცხადებას აკეთებს რადიო თავისუფლებასთან საუბარში დაზარალებული გოგოს დედა. მისი მტკიცებით, ექსპერტიზამ დაადასტურა გაუპატიურების ფაქტი და სასამართლომაც შესაბამისი მტკიცებულებების საფუძველზე სამართლიანად ცნო დამნაშავედ მოზარდი. ექსპერტიზის დასკვნა რადიო თავისუფლებისთვის ხელმისაწვდომი არა. დაზარალებულის დედის თქმით, ექსპრეტიზის დასკვნა პროკურატურას აქვს გადაცემული. რაც შეეხება ბრალდებებს „გამომძიებელთან მეგობრული ურთიერთობის“ გამოყენებ...