„აი, ამ აბსურდულმა და ამორალურმა ბრალდებამ არ უნდა დაგანახოთ, რომ ყველა სხვა საქმე ჩემს მიმართ შეთითხნილია და თითიდანაა გამოწოვილი და რომ აბსოლუტურად ტყუილად მამყოფებენ საპატიმროში“, - წერია სააკაშვილის სახელით მის ფეისბუკგვერდზე გამოქვეყნებულ განცხადებაში. 2016 წლის 4 ოქტომბერს თბილისში, კოლმეურნეობის მოედანზე „ნაციონალური მოძრაობის“ ოფისთან ოპოზიციონერი დეპუტატის, გივი თარგამაძის ავტომანქანა ააფეთქეს. გამოძიება მაშინ აცხადებდა, რომ ასაფეთქებელი მოწყობილობა ავტომანქანის უკანა ნაწილის ქვედა მხარეს დარჩო ხეჩუაშვილმა დაამაგრა და შემდეგ მოქმედებაში მოიყვანა. მასზე ძებნა გამოცხადდა, 2019 წელს კი 18-წლიანი პატიმრობა მიუსაჯეს. შინაგან საქმეთა სამინისტროს თანამშრომლებმა დარჩო ხეჩუაშვილი 2024 წლის 19 სექტემბერს დააკავეს, როცა მას საქართველოში შემოსვლა უნდოდა. გუშინ, 11 ოქტომბერს, პროკურატურამ გაავრცელა პოლიტიკოს გივი თარგამაძის აფეთქების საქმეზე მსჯავრდებულ დარჩო ხეჩუაშვილის ჩვენებაზე დაყრდნობით ინფორმაცია. პროკურორ ამირან გულუაშვილს არ უსაუბრია ექსპრეზიდენტ მიხეილ სააკაშვილის ბრალეულობაზე, თუმცა აღნიშნა, რომ აფეთქებამდე თარგამაძეს სააკაშვილის დავალებით უთვალთვალებდნენ. ასევე ნახეთ აფეთქებამდე თარგამაძეს სააკაშვილის დავალებით უთვალთვალებდნენ - პროკურატურა ბრალდებულის ჩვენებაზე დაყრდნობით ინფორმაციას ავრცელებს გივი თარგამაძე რადიო თავისუფლებას ეუბნება, რომ პროკურატურამ მის მიერ გამოძიებისთვის მიწოდებული ვერსია დაადასტურა იმ განსხვავებით, რომ მისი თქმით, დამკვეთი პარტია „ქართული ოცნების“ დამფუძნებელი ბიძინა ივანიშვილია. ...