ლიეტუვის პარლამენტის არჩევნების წინასწარი ოფიციალური შედეგებით, პირველ ტურში ყველაზე მეტი ხმა, დაახლოებით 20%, ოპოზიციურმა სოციალ-დემოკრატიულმა პარტიამ მიიღო. ლიეტუვის საარჩევნო ადმინისტრაციის მონაცემებით, ქრისტიან-დემოკრატების მმართველი კონსერვატიული პარტია ხმების დაახლოებით 18%-ით მეორე ადგილზეა. დაახლოებით 15% მიიღო პოპულისტურმა პარტიამ „ნემანის განთიადი“. საპარლამენტო არჩევნებში 14 პარტია და ერთი კოალიცია მონაწილეობდა. გამოცემა Delfi კენჭისყრის წინასწარ ოფიციალურ შედეგებზე დაყრდნობით წერს, რომ 5%-იანი ბარიერი გადალახეს დემოკრატების კავშირმა, ლიბერალების მოძრაობამ და ფერმერების და „მწვანეების“ კავშირმა. ასევე ნახეთ ლიეტუვის სეიმმა დაამტკიცა სკოლის დამთავრების შემდეგ ჯარში სავალდებულო გაწვევის კანონი 13 ოქტომბერს ჩატარებული კენჭისყრის პირველ ტურში ამომრჩეველთა აქტივობა 52,06% იყო. ლიეტუვის პარლამენტის, სეიმის 141 დეპუტატიდან 71-ს ერთმანდატიან ოლქებში ირჩევენ, 70-ს კი - პროპორციული სიებით. თუ ერთმანდატიან ოლქებში ვერცერთი კანდიდატი ვერ მიიღებს ამომრჩეველთა ხმების სულ მცირე მეხუთედს, მეორე ტურში მონაწილეობას მიიღებს საუკეთესო შედეგების მქონე ორი კანდიდატი. მეორე ტურის კენჭისყრა 27 ოქტომბერს ჩატარდება. ასევე ნახეთ ახალი ევროკომისია: ბალტიის ქვეყნებმა ძალაუფლება მიიღეს, გაფართოების მომავალი კი ბუნდოვანია ნატოს და ევროკავშირის წევრი ლიეტუვა უკრაინის ერთ-ერთი ყველაზე აქტიური მხარდამჭერია და ამ ქვეყნის წინააღმდეგ რუსეთს ომს საკუთარი უსაფრთხოებისთვისაც პირდაპირ რისკად განიხილავს. საპარლამენტო არჩევნების პირველ ტურში პირველ ადგილზე გასული სოციალ-დემოკრატიული პარტიის ლიდერმა ვილია ბლინკევიჩუტემ ტელეკომპანია LRT-სთან ინტერვიუში განაცხადა, რომ ლიეტუვის საგარეო პოლიტიკა არ შეიცვლება და უკრაინის დახმარება პრიორიტეტად დარჩება. ბლინკევიჩუტემ კოალიციური მთავრობის დასაკომპლექტებლად სავარაუდო პარტნიორებად დაასახელა დემოკრატების კავშირი და ფერმერების და „მწვანეების“ კავშირი, კონსერვატორებთან კოალიციის შესაძლებლობის შესახებ დასმულ შეკითხვას კი უპასუხა, რომ ამის საჭიროება არ იქნება. ...