გერმანიაში ფედერალური დაზვერვისა და კონტრდაზვერვის სამსახურის (BND) პრეზიდენტი ბრუნო კალი გამოვიდა გაფრთხილებით რუსეთის მხრიდან კონკრეტული სამხედრო საფრთხის არსებობის შესახებ. „არაუგვიანეს ამ ათწლეულის ბოლოსი რუსეთის შეიარაღებულ ძალებს უნდა შეეძლოთ ნატოზე პირდაპირი თავდასხმის განხორციელება“, თქვა კალმა ორშაბათს ბუნდესტაგის საპარლამენტო კონტროლის კომიტეტში გამართულ დაზვერვის ხელმძღვანელების ღია მოსმენაზე. კალმა ხაზგასმით აღნიშნა, რომ „კრემლი გერმანიას მოწინააღმდეგედ განიხილავს“, განსაკუთრებით იმიტომ, რომ გერმანია აქტიურად უჭერს მხარს უკრაინას. „ჩვენ რუსეთთან პირდაპირ კონფრონტაციაში ვართ. სინამდვილეში პუტინს უკრაინა არ სჭირდება. რეალურად ის ახალი მსოფლიო წესრიგის შექმნისკენ ისწრაფვის,“ თქვა კალმა. BND-ს ხელმძღვანელმა ასევე აღნიშნა, რომ რუსეთის სადაზვერვო სამსახურები თავიანთი შესაძლებლობების ფარგლებში სრული ძალით მოქმედებენ „ყოველგვარი შეზღუდვების გარეშე“. კალი უშვებს, რომ სავსებით შესაძლებელია სიტუაციის შემდგომი ესკალაცია. კონსტიტუციის დაცვის უწყების ხელმძღვანელმა თომას ჰალდენვანგმა ყურადღება გაამახვილა რუსეთის ჰიბრიდული და საიდუმლო ოპერაციების გაძლიერებაზე. „ჩვენ ვაფიქსირებთ რუსეთის სპეცსამსახურების აგრესიულ ქმედებებს“, განაცხადა ჰალდენვანგმა. კერძოდ, გახშირდა რუსეთის მხრიდან ჯაშუშობისა და დივერსიის შემთხვევები და გაიზარდა მათი ხარისხის დონე. ასევე ნახეთ როგორ ემზადება პოლონეთი რუსეთთან ომისთვის სამხედრო კონტრდაზვერვის უწყების პრეზიდენტმა მარტინა როზენბერგმა ისაუბრა ბუნდესვერის წინააღმდეგ რუსეთის სადაზვერვო სამსახურების ჯაშუშობის მცდელობების შესახებ. სადაზვერვო საქმიანობა ხორციელდება უკრაინაში იარაღის მიწოდების სფეროში, ჯარისკაცების მომზადების ადგილებზე ან თავდაცვითი პროექტების სფეროში. ჯაშუშობა ასევე გამოიყენება დივერსიული აქტების განსახორციელებლად, რაც მიზნად ისახავს მოსახლეობაში დაუცველობის განცდის შექმნას. ბუნდესტაგის საპარლამენტო კონტროლის კომიტეტი წელიწადში ერთხელ ატარებს სადაზვერვო სამსახურების ხელმძღვანელების საჯარო მოსმენებს. ...