ირანის წინააღმდეგ ისრაელის საპასუხო დარტყმის სამიზნეები იქნება სამხედრო და არა ბირთვული ან ნავთობის ობიექტები. The Washington Post-ის ცნობით, ამის შესახებ ისრაელის პრემიერ-მინისტრმა ბენიამინ ნეთანიაჰუმ 9 ოქტომბერს სატელეფონო საუბრისას შეატყობინა აშშ-ის პრეზიდენტ ჯო ბაიდენს. ვაშინგტონში „შვებით“ შეხვდნენ ისრაელის გეგმას, ირანის მხოლოდ სამხედრო ობიექტებს შეუტიოს მასიური სარაკეტო თავდასხმის საპასუხოდ, რომელიც ირანმა 1 ოქტომბერს განახორციელა ისრაელის ტერიტორიაზე, წერს გაზეთი. მანამდე შეერთებული შტატებისა და ისრაელის წარმომადგენლებმა გამართეს მოლაპარაკებების სერია, რომლის დროსაც ვაშინგტონი შეეცადა, შეეზღუდა ისრაელის შესაძლო საპასუხო ზომები, რათა თავიდან იქნეს აცილებული ახლო აღმოსავლეთში კონფლიქტის კიდევ უფრო მეტად გაფართოება. პრეზიდენტმა ჯო ბაიდენმა თქვა, რომ ისრაელის ადგილზე ის იფიქრებდა ირანის ნავთობის საბადოებზე თავდასხმის ალტერნატივებზე, იტყობინება Reuters-ი. ანალიტიკოსები შიშობდნენ, რომ ირანის ნავთობის ობიექტებზე თავდასხმამ შეიძლება გამოიწვიოს ენერგომატარებლების ფასების ზრდა, ხოლო ბირთვულ ობიექტებზე თავდასხმამ შეიძლება გამოიწვიოს შემდგომი ესკალაციის პროვოცირება და კონფლიქტში შეერთებული შტატების ჩათრევა, აღნიშნავს The Washington Post-ი. ისრაელი გეგმავს, ირანს დაარტყას აშშ-ის საპრეზიდენტო არჩევნებამდე, რომელიც 5 ნოემბერს არის დაგეგმილი, ვინაიდან თეირანმა შესაძლოა საპასუხო ქმედებების დიდხანს გადადება ისრაელის სისუსტედ აღიქვას, განაცხადა გაზეთის თანამოსაუბრემ. ამასთან, ისრაელი ირანის ბოლო თავდასხმას ისე უპასუხებს, რომ თავიდან აიცილოს „ამერიკის არჩევნებში პოლიტიკური ჩარევა“, - თქვა გაზეთის წყარომ ამ საკითხთან დაკავშირებით. გარდა ამისა, შეერთებულ შტატებთან კონსულტაციების დროს ისრაელმა გამოაცხადა, რომ ლიბანში ოპერაციებს „უახლოეს კვირებში“ შეწყვეტს, წერს The Washington Post-ი. ასევე ნახეთ 20-ზე მეტი ადამიანი დაიღუპა ლიბანის ერთ-ერთ სოფელზე ისრაელის ავიადარტყმის შედეგად ლიბანში ისრაელი ებრძვის რადიკალურ შიიტურ დაჯგუფება ჰეზბოლას, რომელსაც ირანი უჭერს მხარს. 15 ოქტომბერს ისრაელის სარაკეტო თავდასხმას ჩრდილოეთ ლიბანში 21 ადამიანი ემსხვერპლა. დარტყმა განხორციელდა საცხოვრებელ კორპუსზე სოფელ აიტუში. იქ ცხოვრობდნენ ოჯახები, რომლებიც გადავიდნენ სამხრეთ ლიბანიდან, სადაც ისრაელის არმია სახმელეთო ოპერაციას აწარმოებს ჰეზბოლას წინააღმდეგ. პუბლიკაციაში ნათქვამია, რომ ნეთანიაჰუს „უფრო თავშეკავებულმა პოზიციამ“ გავლენა მოახდინა აშშ-ის პრეზიდენტის გადაწყვეტილებაზე, ისრაელს მიაწოდოს სარაკეტო თავდაცვის სისტემა THAAD. პენტაგონმა 13 ოქტომბერს გამოაცხადა, რომ ისრაელში THAAD-ის ბატარეა განთავსდება. ისრაელის პრემიერ-მინისტრის ოფისმა არ უპასუხა WP-ის მოთხოვნას კომენტარზე...