როგორც გამოცემა წერს, ჟურნალისტის კითხვაზე, რა არის მისი ყველაზე დიდი წუხილი, პრეზიდენტი პასუხობს: "ის, რომ ჩვენ ხელიდან გავუშვით პირველი შანსი, მოლაპარაკებები გაგვეხსნა [ევროკავშირთან]". "თუკი ქარტიაზე ხელმომწერი პროევროპული ძალები და პარტიები არჩევნებს მოიგებენ, ალბათ მათთან ერთად ვიქნები, რათა ეს ქარტია მივიტანო მომდევნო ევროპულ საბჭომდე და უზრუნველვყო მოლაპარაკებების გახსნა რომელიმე პოზიციიდან, რაც ჯერ კიდევ უნდა განისაზღვროს", - ამბობს ზურაბიშვილი. გამოცემის ცნობით, კითხვაზე, თუ რას ფიქრობს თავის მემკვიდრეობაზე, პრეზიდენტი სიამაყეს გამოხატავს ოპოზიციის გაერთიანებაში თავისი ძალისხმევის გამო. როგორც Politico წერს, სალომე ზურაბიშვილი არჩევნებს "ეგზისტენციალურს" უწოდებს, თუმცა სიფრთხილეს იჩენს შედეგების პროგნოზის გაკეთებისას. ინტერვიუში პრეზიდენტი აღნიშნავს, რომ "ქართული ოცნებისთვის" "საკმაოდ რთული" იქნება დასავლელ პარტნიორებთან ურთიერთობის აღდგენა. "მათთვის საკმაოდ რთული იქნება ევროკავშირთან და ამერიკელ პარტნიორებთან რაიმე სახის ურთიერთობების განახლება იმ რაოდენობის თავდასხმების შემდეგ, რასაც ისინი ახორციელებენ". "საით მიგყავთ საქართველო?" - Politico-ს ცნობით, ეს სალომე ზურაბიშვილის მთავარი კითხვაა "ქართული ოცნების" საპატიო თავმჯდომარის, ბიძინა ივანიშვილის მიმართ. "კონსპირაციების თეორიებში ვერ შევალ, თუმცა ეს შეიძლება იყოს გეგმა... შეიძლება [ბიძინა ივანიშვილის] კავშირები მოსკოვთან ჯერ კიდევ არის და ის კიდევ უფრო გამყარდეს", - ციტირებს პრეზიდენტს Politico. ასევე ნახეთ ბორელი: მმართველი პარტიის ქმედებები საქართველოს ევროპული გზიდან აშორებს, რაც ავტორიტარიზმისკენ გადასვლაა ასევე ნახეთ ევროკავშირი: დემოკრატიული უკუსვლის გამო საქართველო 121 მილიონ ევროს დაკარგავს საქართველოში საპარლამენტო არჩევნები 26 ოქტომბერს გაიმართება. დეპუტატებს მხოლოდ პროპორციული სისტემით აირჩევენ. პარლამენტის წევრთა მანდატები განაწილდება იმ პოლიტიკურ პარტიებზე, რომლებიც 5%-იან ბარიერს გადალახავენ. საპარლამენტო არჩევნებისთვის პარტიების ბლოკებად გაერთიანება აკრძალულია, ერთადერთი გზა არჩევნებში მათი ერთად მონაწილეობისთვის არის საერთო საარჩევნო სიის შექმნა. საარჩევნო სიაში შეიძლება აღმოჩნდეს მხოლოდ არჩევნებში მონაწილე პარტიის წევრი ანდა უპარტიო პოლიტიკოსი. ...