დაავადებათა კონტროლისა და საზოგადოებრივი ჯანმრთელობის ეროვნული ცენტრის განცხადებით, დღეს, 18 ოქტომბერს, მაღალი რისკის ჯგუფებისთვის სეზონური გრიპის საწინააღმდეგო ვაქცინაცია დაიწყო. გრიპის სეზონისათვის მზადყოფნის მიზნით, შეძენილია Abbott Biologicals B.V.-ის (ნიდერლანდი) წარმოების სეზონური გრიპის საწინააღმდეგო ოთხკომპონენტიანი ვაქცინა INFLUVAC. დაავადებათა კონტროლის ცენტრი აღნიშნავს, რომ ჩვეულებრივ, ჯანმრთელი ადამიანები გრიპს გადაიტანენ გართულებისა და მძიმე მიმდინარეობის გარეშე და ყოველგვარი სპეციფიკური სამედიცინო დახმარების გარეშე ერთ კვირაში გამოჯანმრთელდებიან. თუმცა ზოგიერთი ადამიანისთვის, განსაკუთრებით ზოგიერთი ქრონიკული დაავადების ან მდგომარეობის მქონეთათვის, გრიპი შესაძლოა სახიფათო დაავადებად იქცეს. განცხადებაში ვკითხულობთ, რომ სწორედ ამიტომ სახელმწიფო ყოველწლიურად სრულად უზრუნველყოფს სეზონური გრიპის პროფილაქტიკას გრიპის გართულების რისკის მქონე 200 000 მოქალაქისთვის. გრიპის სეზონისათვის ვაქცინაციის მიზნით, მაღალი რისკის ჯგუფებად განისაზღვრა სპეციფიკური ქრონიკული დარღვევების მქონე პირთა შემდეგი ჯგუფები: დიაბეტის მქონე პირები; დიალიზზე მყოფი პირები; C ჰეპატიტის მქონე პირები (მხოლოდ მკურნალობაზე მყოფნი); აივ ინფექცია/შიდსის მქონე პირები; ორგანოგადანერგილი და მუკოვისციდოზის დაავადების მქონე პირები; 60 წლის და უფროსი ასაკის ხანდაზმული პირები; ორსულები; ზოგადსაგანმანათლებლო დაწესებულების (სკოლები) პედაგოგები; ბავშვთა (მ.შ. მცირე საოჯახო ტიპის) და მოხუცთა თავშესაფრების ბენეფიციარები და მათი მომვლელი პერსონალი; სავალდებულო ვაქცინაციას დაქვემდებარებული პერსონალი და სხვ. 4 ნოემბრიდან, ქვეყნის მასშტაბით, გრიპის საწინააღმდეგო ვაქცინა ხელმისაწვდომი იქნება საქართველოს მოქალაქეობის მქონე ნებისმიერი პირისთვის 6 თვის ასაკიდან. „დაასწარით გრიპის ვირუსს! დროულად ჩაიტარეთ სეზონური გრიპის საწინააღმდეგო იმუნიზაცია!“ - აცხადებს დაავადებათა კონტროლის ცენტრი. განცხადებაში ვკითხულობთ, რომ გრიპის ვირუსებს ცვალებადობის მაღალი უნარი აქვს და შესაბამისად საჭირო ხდება მოსალოდნელი მოცირკულირე შტამების გათვალისწინებით ყოველწლიურად შეიცვალოს სეზონური ვაქცინის კომპოზიცია და ვაქცინაცია სეზონური გრიპის ვირუსების აქტიური ცირკულაციის დაწყებამდე ასევე ყოველწლიურად ჩატარდეს. „ვაქცინაციიდან ორი კვირის ვადაში ორგანიზმი გამოიმუშავებს იმუნიტეტს იმ კონკრეტული ვირუსების მიმართ, რომელიც გათვალისწინებული იყო სეზონურ ვაქცინაში. გრიპის ვაქცინების მრავალწლიანმა გამოყენებამ აჩვენა მათი მაღალი უსაფრთხოება და ეფექტურობა - განსაკუთრებით მძიმედ მიმდინარე გრიპის რისკის მქონე ჯგუფებში. ვაქცინალური ვირუსისა და სეზონის მანძილზე მოცირკულირე გრიპის ვირუსთა თანხვედრისას ავად გახდომის რისკი საგრძნობლად დაბალია, ხოლ...