აშშ-ის პრეზიდენტი ჯო ბაიდენი პარასკევს ოფიციალური ვიზიტით ჩავიდა ბერლინში. ეს მისი ბოლო ვიზიტია გერმანიაში სახელმწიფოს მეთაურის რანგში. ის ბელვიუს საპრეზიდენტო სასახლეს ეწვია და შეხვდა გერმანიის კანცლერ ოლაფ შოლცს. ბაიდენისა და შოლცის საუბრის ერთ-ერთი მთავარი თემა იყო ომი უკრაინაში. გერმანია შეერთებული შტატების შემდეგ მეორე ქვეყანაა კიევისთვის სამხედრო დახმარების მოცულობით. ბაიდენმა მადლობა გადაუხადა შოლცის მთავრობას უკრაინის მხარდაჭერისთვის. „რუსეთის ომი უკრაინის წინააღმდეგ არის თავდასხმა მეგობრულ დემოკრატიაზე, მაგრამ ასევე იმ პრინციპებზე, რომლებიც ევროპაში 75 წლის განმავლობაში ინარჩუნებდნენ მშვიდობასა და უსაფრთხოებას“, - თქვა მან. ასევე ნახეთ ჯო ბაიდენმა გამოაცხადა უკრაინის დახმარების 425-მილიონიანი პაკეტის შესახებ ამერიკის პრეზიდენტმა ხაზგასმით აღნიშნა, რომ უკრაინას მკაცრი ზამთარი ელის და მოკავშირე ქვეყნებმა მისი დახმარება უნდა გააძლიერონ. „მე მესმის, რომ ფასი მაღალია,“ - თქვა მან, „მაგრამ ეს არაფერია იმ სამყაროში ცხოვრების პერსპექტივასთან შედარებით, სადაც აგრესია მართავს და დიდი ქვეყნები თავს ესხმიან პატარებს მხოლოდ იმიტომ, რომ მათ ეს შეუძლიათ.“ შოლცმა უპასუხა, რომ გერმანია დაეხმარება უკრაინას „მანამდე, სადამდეც საჭირო იქნება“ და ახსენა, რომ უკრაინის სამხედრო დახმარების გაზრდა და მისი ენერგეტიკული ინფრასტრუქტურის აღდგენის მხარდაჭერა შესაძლებელია ევროპაში დაბლოკილი რუსული აქტივების გამოყენებით. გერმანიის მედია ხაზს უსვამს, რომ პრეზიდენტმა და კანცლერმა არ ახსენეს უკრაინის პრეზიდენტ ვოლოდიმირ ზელენსკის მიერ წარმოდგენილი ე.წ გამარჯვების გეგმა. ორივე მათგანი სკეპტიკურად უყურებს ზელენსკის მთავარ მოთხოვნებს - ნატოში უკრაინის დაჩქარებულ შესვლას და რუსეთის ტერიტორიაზე შორსმსროლელი არტილერიის გამოყენებას. ოლაფ შოლცმა თქვა: „ჩვენ გარანტიას ვიძლევით, რომ ნატო არ გახდება ომის მხარე, რათა ამ ომმა არ გამოიწვიოს კიდევ უფრო დიდი კატასტროფა, ჩვენ კარგად ვაცნობიერებთ ამ პასუხისმგებლობას და ვერავინ წაგვართმევს მას“. მან კიდევ ერთხელ ხაზგასმით აღნიშნა, რომ არ ეთანხმება უკრაინისთვის Taurus-ის შორი მოქმედების რაკეტების მიწოდების იდეას. სახელმწიფოს მეთაურებმა ასევე განიხილეს ვითარება ახლო აღმოსავლეთში. შოლცის თქმით, ის და აშშ-ის პრეზიდენტი იმედოვნებენ, რომ ყველაფერს გააკეთებენ, რათა თავიდან აიცილონ კონფლიქტის ესკალაცია და ამავე დროს აღიარებდნენ ისრაელის უფლებას თავდაცვაზე. მან აღნიშნა, რომ აქვს ცეცხლის შეწყვეტისა და ისრაელისელი მძევლების დაბრუნების იმედი, რაც გზას გაუხსნის საბოლოოდ პალესტინის სახელმწიფოს შექმნას. ბაიდენი პარასკევს ასევე შეხვდა ფედერალურ პრეზიდენტ ფრანკ-ვალტერ შტაინმაიერს. შტაინმაიერმა ბაიდენს გადასცა გერმანიის უმაღლესი ჯილდო, „ფედერალური რ...