5G უახლესი და უსწრაფესი მობილური ინტერნეტია, რომლის შესაძლებლობები საბოლოოდ ჯერ კიდევ არ არის გამოყენებული. ის 10-ჯერ უფრო სწრაფია, ვიდრე მისი წინამორბედი 4G. თუ სატელეფონო კომპანიები სწორად დანერგავენ ამ სერვისს, არსებობს მოლოდინი, რომ ის 100-ჯერ უფრო სწრაფი გახდება. „მაგთიკომმა“ მაღალი და დაბალი სიხშირის კომბინირებული ლოტი 15-წლიანი ვადით იყიდა. ამ ლოტის ღირებულება 48,8 მილიონი ლარია, საიდანაც 30% ბიუჯეტში უკვე გადაიხადა, დარჩენილ 70%-ს კი ერთი წლის ვადაში დაფარავს. მაღალი ხარისხის 5G ინტერნეტის დასანერგად საჭიროა როგორც მაღალი და დაბალი, ისე საშუალო დიაპაზონის სიხშირეები. დაბალი სიხშირე უფრო უკეთ ფარავს ტერიტორიას და დაბალი სიჩქარე აქვს, მაღალ სიხშირეებს კი მცირე ტერიტორიის დაფარვა შეუძლია, თუმცა უფრო ხარისხიან ინტერნეტს სთავაზობს მომხმარებელს. კომისიას აუქციონი გამოცხადებული აქვს საშუალო დიაპაზონის სიხშირეებზეც. „მაგთიკომი“ ამ აუქციონშიც მონაწილეობს. საქართველოში სამი GSM ოპერატორია. კომუნიკაციების კომისიის 2023 წლის ანგარიშის მიხედვით, აბონენტების 41% „მაგთიშია“ ჩართული, 34% - „სილქნეტში“, 24% კი - „სელფიში“. „მაგთი“ ერთადერთი კომპანიაა, რომელსაც ამ დრომდე ქვეყნის არცერთ წერტილში 5G ინტერნეტი არ აქვს დანერგილი. ასევე ნახეთ ყველაფერი, რაც 5G ინტერნეტზე უნდა იცოდე: რატომ არის საჭირო, როდის და ვისთვის იქნება წინა აუქციონში ყველაზე დიდმა ორმა კომპანიამ („სილქნეტი“ და „მაგთი“) მონაწილეობა არ მიიღო, რადგან ლიცენზიის მიღებასთან ერთად მათ გაუჩნდებოდათ ვალდებულება საკუთარი ინფრასტრუქტურა საბითუმო ფასად (იმაზე იაფად, ვიდრე საკუთარ აბონენტებს შესთავაზებდნენ ზუსტად იმავე სერვისებს) დაეთმოთ კონკურენტებისთვის - ამ შემთხვევაში „ვირტუალური ოპერატორებისთვის“ (დღეს საქართველოში მხოლოდ ერთი ასეთი ოპერატორია - „ჰალო“). 2023 წლის ივლისში გამოცხადებულ აუქციონში „სელფიმ“ გაიმარჯვა, „სილქნეტმა“ კი უკვე არსებული საშუალო დიაპაზონის სიხშირე გამოიყენა 5G-სთვის. ...