შეერთებულ შტატები პრინციპულად აღარ ეწინააღმდეგება უკრაინის ნატოში მიწვევას. ამის შესახებ Le Monde-ი წერს დიპლომატიურ წყაროებზე დაყრდნობით, რომლებიც იცნობენ 18 ოქტომბერს ბერლინში შეერთებული შტატების, საფრანგეთის, გერმანიისა და დიდი ბრიტანეთის ლიდერების შეხვედრის შედეგებს. გამოცემის თანამოსაუბრეების თქმით, შეერთებული შტატების პრეზიდენტმა ჯო ბაიდენმა შესაძლოა გარდამავალ პერიოდში დაიწყოს უკრაინის მიწვევის პროცესი, თუ არჩევნებში დემოკრატი კანდიდატი და მოქმედი ვიცე-პრეზიდენტი კამალა ჰარისი გაიმარჯვებს. ამასთან, Le Monde-ის თანამოსაუბრე განმარტავს, რომ თუ რესპუბლიკელი დონალდ ტრამპი გაიმარჯვებს, „ბაიდენის მცირე ინიციატივამაც კი შესაძლოა გააუარესოს ვითარება“. ასევე ნახეთ დასავლელმა ლიდერებმა ბერლინში განიხილეს ვოლოდიმირ ზელენსკის "გამარჯვების გეგმა" Le Monde-ი წერს, რომ თუ შეერთებული შტატები პრინციპულად არ შეეწინააღმდეგება უკრაინის ნატოში მიწვევას, მაშინ შესაძლოა გერმანიამაც შეიცვალოს პოზიცია. გაზეთის წყაროებმა ასევე განაცხადეს, რომ ოთხი ქვეყნის ლიდერებმა ბერლინში გამართულ შეხვედრაზე განიხილეს უკრაინის მიერ რუსეთის ტერიტორიაზე თავდასხმებისთვის შორი მოქმედების იარაღის გამოყენების აკრძალვის გაუქმების შესაძლებლობაც. საფრანგეთი და დიდი ბრიტანეთი მზად არიან, დაუშვან ასეთი დარტყმები, გერმანია და შეერთებული შტატები შიშობენ, რომ ეს კონფლიქტის შემდგომ ესკალაციას გამოიწვევს, ნათქვამია გამოცემაში. უკრაინის ნატოში მიწვევა უკრაინის პრეზიდენტ ვოლოდიმირ ზელენსკის ე.წ გამარჯვების გეგმის ერთ-ერთი პუნქტია. მას ბაიდენის გადადგომამდე მიწვევის იმედი აქვს. თავის მხრივ, შვიდი ქვეყნის თავდაცვის მინისტრებმა შაბათს, 19 ოქტომბერს, ნეაპოლში გამართულ შეხვედრაზე უკრაინას მხარდაჭერა გამოუცხადეს ევროინტეგრაციის გზაზე, მათ შორის, ნატოში გაწევრიანების საკითხში. მინისტრების განცხადებაში ნათქვამია, რომ „დიდი შვიდეულის“ ქვეყნების სპეციალისტები გააგრძელებენ უკრაინული სამხედრო პერსონალის მომზადებას და უკრაინის არმიის რეფორმირებას, რათა ის ალიანსის სტანდარტებთან თავსებადი გახდეს. ...