20 ოქტომბერს მოლდოვაში მიმდინარეობს საპრეზიდენტო არჩევნები, უბნები მთელი ქვეყნის მასშტაბით დილის 7 საათზე გაიხსნა. პარალელურად, მოქალაქეები მონაწილეობენ რეფერენდუმში მოლდოვის ევროკავშირში გაწევრიანების საკითხზე. საამისოდ ქვეყნის კონსტიტუციაში ცვლილებები უნდა შეიტანონ. მოლდოვის ცენტრალური საარჩევნო კომისიის მონაცემებით, შუადღისთვის ამომრჩევლის აქტივობამ გადააჭარბა 33.3 პროცენტს - რაც ნიშნავს, რომ კენჭისყრა შედგა. პრეზიდენტის პოსტისთვის იბრძვის 11 პოლიტიკოსი, მათ შორის მოქმედი პრეზიდენტი, მაია სანდუ - რომელიც გამოდის ქვეყნის პროევროპული კურსის დასაცავად და მხარს უჭერს მოლდოვის ევროკავშირში გაწევრიანებას. მეორე ტურში გადასვლის შანსს უწინასწარმეტყველებენ ყოფილ გენერალურ პროკურორს, ალექსანდრ სტოიანოგლოს - რომელსაც ოპოზიციური, სოციალისტური პარტია უჭერს მხარს. პარტიის ლიდერი, ექსპრეზიდენტი იგორ დოდონი კენჭს არ იყრის და მხარდამჭერებს მოუწოდებს ხმა სტოიანოგლოს მისცენ, მაგრამ სოციალისტებმა ვერც ერთი სხვა პარტიის დაყოლიება ვერ შეძლეს თავიანთი კანდიდატის მხარდაჭერაზე. როგორც დოდონის, ისე სტოიანოგლოს გარშემო რამდენიმე მუხლით მიმდინარეობს გამოძიება. ექსპრეზიდენტს ადანაშაულებენ კორუფციაში და სახელმწიფოს ღალატში, ყოფილ გენერალურ პროკურორს - კორუფციაში და ძალაუფლების ბოროტად გამოყენებაში. ორივე აცხადებს, რომ მათი საქმეები პოლიტიკურადაა მოტივირებული და აღძრულია პირადად პრეზიდენტ სანდუს ბრძანებით - სანდუ, თავის მხრივ, ამას უარყოფს. ცენტრისტული ორიენტაციის "ჩვენი პარტიიდან" კენჭს იყრის ქალაქ ბელცის ყოფილი მერი, რენატო უსატი. ის 2020 წელსაც ცდილობდა გაპრეზიდენტებას და მაშინ მესამე ადგილი მოიპოვა, სანდუსა და დოდონის შემდეგ. მოლდოვის ხელისუფლება, ასევე დასავლეთის რამდენიმე ქვეყანა - მათ შორის აშშ - არჩევნებამდე ლაპარაკობდნენ რუსეთის ჩარევაზე წინასაარჩევნო კამპანიაში. რუსეთის ინტერესების გამტარებლად ასახელებდნენ ბიზნესმენ ილან შორს, რომელიც უცხოეთში ცხოვრობს და მოლდოვაში დაუსწრებლად არის გასამართლებული. შორმა ახლახან რუსეთის მოქალაქეობა მიიღო. საუბარი ეხებოდა პრორუსული მესიჯების გავრცელებას და ამომრჩევლის მოსყიდვის მცდელობებს. მოლდოვის ხელისუფლება ასევე შიშობს, რომ პრორუსული ძალები არჩევნების შემდეგ გამოიწვევენ არეულობას. ასევე ნახეთ 5 ტაქტიკა, რომლებსაც კრემლი იყენებს 2024 წლის არჩევნებში ჩასარევად ...