მოლდოვაში ჩატარებული რეფერენდუმის განახლებული, წინასწარი შედეგებით, მცირედით დაწინაურდნენ ევროკავშირში გაწევრების მხარდამჭერები. რადიო თავისუფლების მოლდოვური სამსახური ცენტრალური საარჩევნო კომისიის მონაცემებზე დაყრდნობით წერს, რომ შედეგების 98,33%-ის დათვლის მიხედვით, შეკითხვას, მხარს უჭერთ თუ არა კონსტიტუციაში შესწორებას ევროკავშირთან მოლდოვის შეერთების მიზნით, დადებითად უპასუხა 50,03%-მა და უარყოფითად 49,97%-მა. ამ მონაცემებით, მომხრეების რიცხვი დაახლოებით 800-ით მეტია. რეფერენდუმის შედეგების 97,93%-ის შეჯამება აჩვენებდა, რომ საკონსტიტუციო ცვლილებას მხარს უჭერდა 49,87% და არ ემხრობოდა 50,13%. 2022 წლის ივნისში, ევროკავშირის ლიდერთა სამიტზე მოლდოვას წევრობის კანდიდატი ქვეყნის სტატუსი მიანიჭეს. 2023 წლის დეკემბერში ევროპულმა საბჭომ მხარი დაუჭირა ევროკავშირში გაწევრების საკითხზე მოლდოვასთან მოლაპარაკების დაწყებას. ასევე ნახეთ სანდუმ „დანაშაულებრივ დაჯგუფებებს“ ბრალი დასდო „დემოკრატიაზე უპრეცედენტო თავდასხმაში“ 20 ოქტომბერს მოლდოვაში ჩატარდა საპრეზიდენტო არჩევნებიც, რომლის შედეგად პირველივე ტურში გასამარჯვებლად საჭირო, ხმების 50%-ზე მეტი ვერცერთმა კანდიდატმა ვერ მიიღო. ხმების 97,88%-ის შეჯამებით პირველ ადგილზე მოქმედი პრეზიდენტი, პროევროპული მემარჯვენე-ცენტრისტული ლიბერალური პარტიის, „მოქმედება და სოლიდარობის" კანდიდატი მაია სანდუა(41,84%), მეორეზე კი - პრორუსული ორიენტაციის სოციალისტური პარტიის კანდიდატი, ყოფილი გენერალური პროკურორი ალექსანდრ სტოიანოგლო(26,35%). საპრეზიდენტო არჩევნებში სულ 11 კანდიდატი მონაწილეობდა. საპრეზიდენტო არჩევნების და რეფერენდუმის წინ მოლდოვის პროევროპული ხელისუფლება აცხადებდა, რომ რუსეთი და მის მიერ მხარდაჭერილი, მოლდოვიდან მოსკოვში გაქცეული ოლიგარქი ილან შორი ამომრჩევლის მოსყიდვას შეეცდებოდნენ. საპრეზიდენტო არჩევნების და რეფერენდუმის პირველი წინასწარი შედეგების გამოქვეყნების შემდეგ მოლდოვის პროევროპელმა პრეზიდენტმა მაია სანდუმ „დანაშაულებრივ დაჯგუფებებს და უცხოურ ძალებს“ ბრალი დასდო „დემოკრატიაზე უპრეცედენტო თავდასხმაში“. 21 ოქტომბერს, შუაღამის შემდეგ სანდუმ კიშინიოვში, თავის საარჩევნო შტაბში გამართულ ბრიფინგზე განაცხადა, რომ აქვთ მტკიცებულებები, რომ დანაშაულებრივი დაჯგუფებების მიზანი იყო 300 ათასი ხმის ყიდვა. მაია სანდუს თქმით, თაღლითობის მასშტაბი უპრეცედენტოა. ასევე ნახეთ 5 ტაქტიკა, რომლებსაც კრემლი იყენებს 2024 წლის არჩევნებში ჩასარევად ...