კრემლში არც ადასტურებენ და არც უარყოფენ, რომ რუსეთში იმყოფებიან ჩრდილოეთ კორეელი სამხედროები, რომლებიც უკრაინის წინააღმდეგ ომში ჩაერთვებიან. პრეზიდენტ პუტინის პრესმდივან დმიტრი პესკოვს დღეს, 21 ოქტომბერს, მოსკოვში გამართულ ბრიფინგზე ჰკითხეს, არიან თუ არა ჩრდილოეთ კორეის არმიის ჯარისკაცები რუსეთში და იგეგმება თუ არა მათი მონაწილეობა „სპეციალურ სამხედრო ოპერაციაში”, როგორც ამას რუსეთი უწოდებს უკრაინის წინააღმდეგ ომს. პესკოვმა უპასუხა, რომ „სპეციალურ სამხედრო ოპერაციასთან” დაკავშირებული საკითხებით თავდაცვის სამინისტროს უნდა მიმართონ. ამასთან, პუტინის პრესმდივანმა განაცხადა, რომ „ხედავენ ბევრ წინააღმდეგობრივ ინფორმაციას, სამხრეთ კორეელები ერთს ამბობენ, შემდეგ პენტაგონი აცხადებს, რომ მტკიცებულებები არ აქვთ”. ამიტომ, პესკოვმა მედიას ურჩია, მსგავს ინფორმაციასაც წინააღმდეგობრივად მიუდგნენ. კრემლის პრესმდივანმა დღეს ისიც განაცხადა, რომ ჩრდილოეთი კორეა რუსეთის ახლო მეზობელია და მასთან სხვადასხვა სფეროში თანამშრომლობა არ არის მიმართული მესამე ქვეყნების წინააღმდეგ. ასევე ნახეთ სამხრეთ კორეის დაზვერვის ცნობით, რუსეთში გაიგზავნა ჩრდილოეთ კორეის 12 ათასი ჯარისკაცი 18 ოქტომბერს სამხრეთ კორეის დაზვერვის სამსახურმა განაცხადა, რომ ჩრდილოეთ კორეამ გადაწყვიტა რუსეთს 12 ათასი ჯარისკაცით დაეხმაროს უკრაინის წინააღმდეგ საომრად. მისი ინფორმაციით, საუბარია ოთხ ბრიგადაზე, მათ შორის სპეცდანიშნულების ძალებზე, რომელთა მობილიზაცია უკვე დაწყებულია. მედიასაშუალებები სამხრეთ კორეის დაზვერვის სამსახურის მონაცემებზე დაყრდნობით წერდნენ, რომ რუსეთის შორეული აღმოსავლეთის პოლიგონებზე უკვე იმყოფება ჩრდილოეთ კორეიდან გაგზავნილი 1500 ჯარისკაცი. იმავე დღეს უკრაინის თავდაცვის სამინისტროს დაზვერვის მთავარი სამმართველოს ხელმძღვანელმა კირილო ბუდანოვმა განაცხადა, რომ რუსეთის აღმოსავლეთში უკვე ემზადება 11 ათასამდე ჩრდილოკორეელი ქვეითი, რომლებიც 1 ნოემბრისთვის მზად იქნებიან უკრაინის წინააღმდეგ საბრძოლო მოქმედებებში მონაწილეობისთვის. ბუდანოვის თანახმად, პირველ 2600-წევრიან ქვედანაყოფს გაგზავნიან რუსეთის კურსკის ოლქში, სადაც რუსულ არმიასა და უკრაინის თავდაცვის ძალებს შორის ბრძოლა მიმდინარეობს 2024 წლის აგვისტოდან. ასევე ნახეთ ბუდანოვი: უკრაინის წინააღმდეგ საბრძოლველად ჩრდილოეთ კორეის 11 ათასი ჯარისკაცი იგზავნება დღეს, 21 ოქტომბერს, სამხრეთ კორეის მედიასაშუალებებმა გაავრცელეს ცნობა, რომ სამხრეთ კორეის საგარეო საქმეთა სამინისტროში დაიბარეს რუსეთის ელჩი სეულში გეორგი ზინოვიევი, რომელსაც პროტესტი გამოუცხადეს უკრაინის წინააღმდეგ საომრად რუსეთში ჩრდილოეთ კორეელი სამხედროების განთავსების გამო და ქვეყნიდან მათი გაყვანა მოსთხოვეს. თავის მხრივ, რუსეთის საელჩომ განაცხადა, რომ მოსკო...