ირაკლი კობახიძის თქმით, ეს კომპანია საერთაშორისო დონეზე მაღალი რეპუტაციით სარგებლობს და ნაწილობრივ ან სრულად მონაწილეობს პროექტებში, რომელთა შორისაცაა პანამის არხის გაფართოება, სუეცის ახალი არხი ეგვიპტეში, ახალი საზღვაო პორტი ნადორში (მაროკო), ჰამბურგის პორტის გაღრმავების პროექტი, დუბაის ხელოვნური კუნძული და სანაპირო. „მნიშვნელოვანია, რომ ქვეყნისთვის ასეთი სტრატეგიული პროექტის მშენებლობაში დიდი გამოცდილების და მაღალი საერთაშორისო რეპუტაციის მქონე კომპანია იქნება ჩართული... დამეთანხმებით, რომ ეს ჩამონათვალი უკვე მეტყველებს ამ კომპანიის განსაკუთრებულ გამოცდილებაზე და ჩვენ მოხარულები ამ კომპანიის ჩართულობით ვართ ანაკლიის ღრმაწყლოვანი პორტის განვითარებაში“, - თქვა ირაკლი კობახიძემ. მანვე აღნიშნა, რომ პორტის პირველი ფაზის გამტარუნარიანობა იქნება 600 ათასი კონტეინერი წელიწადში, საორიენტაციო საინვესტიციო ღირებულება - 600 მლნ დოლარი და პირველ ეტაპზე დასაქმდება 500-მდე ადამიანი. 2024 წლის 1 აგვისტოს საქართველოს ეკონომიკის სამინისტრომ გაავრცელა ინფორმაცია, რომლის მიხედვითაც, ანაკლიის ღრმაწყლოვანი ნავსადგურის საზღვაო ინფრასტრუქტურის სამშენებლო სამუშაოების განხორციელებისთვის გამოცხადებულ საერთაშორისო ტენდერში გამარჯვებულია Jan De Nul-ი (იან დე ნული). ასევე ნახეთ რა ვიცით ანაკლიის პორტის ინვესტორ კომპანიაზე? წლების წინ კი, 2020 წლის დასაწყისში, საქართველოს მთავრობამ გამოაცხადა, რომ „ანაკლიის განვითარების კონსორციუმთან“ წყვეტდა ღრმაწყლოვანი პორტის მშენებლობის საინვესტიციო ხელშეკრულებას, რადგან კონსორციუმმა ვერ შეასრულა ხელშეკრულებით გათვალისწინებული ვალდებულებები. კონსორციუმი ამას უარყოფდა და საქართველოს მთავრობას ბრალს სდებდა სტრატეგიული პროექტის მიზანმიმართულად ჩაშლაში. მთავრობის გადაწყვეტილების შემდეგ, „ანაკლიის განვითარების კონსორციუმმა“ საქართველოს მთავრობის წინააღმდეგ საარბიტრაჟო სასამართლოს მიმართა. 30 ივლისს გახდა ცნობილი, რომ საერთაშორისო საარბიტრაჟო სასამართლომ არ დააკმაყოფილა „ანაკლიის განვითარების კონსორციუმის“ სარჩელი საქართველოს მთავრობის წინააღმდეგ. ასევე ნახეთ ანაკლიის სანქცირებული ინვესტორი: რას ნიშნავს ჩინეთის სახელმწიფო კომპანიის სტრატეგიულ პროექტში ჩართვა ...