„რადგან ძალიან ვაქტიურობდი არჩევნებთან დაკავშირებით, ძალიან მინდოდა, რომ დამკვირვებელი ვყოფილიყავი. ვთხოვე საელჩოს, საელჩოც დამთანხმდა სიაში შეყვანას. რამდენიმე დღეში საქართველოდან იკითხეს, სოფოს ხომ არ უნდა „ოცნების“ დამკვირვებელი რომ იყოსო. მკითხეს, მე კატეგორიული უარი ვთქვი... დებილები თუ არ არიან, თვეების განმავლობაში ვაპროტესტებ და ვლანძღავ ამ პარტიას“, - ჰყვება სოფო ვიდეომიმართვაში, რომელიც თავისი 419 ათასი გამომწერისთვის ჩაწერა. სოფო ამბობს, რომ სამხრეთ კორეაში „ქართული ოცნების“ წარმომადგენლად დარეგისტრირების შესახებ სოციალური ქსელებით შეიტყო. ცესკოში რადიო თავისუფლებას უთხრეს, რომ სოფო კვინიკაძეს შეუძლია მათ წერილობით მიმართოს და მოითხოვოს, მოიხსნას „ქართული ოცნების“ წარდგენილი წევრობიდან. სოფოს მოთხოვნის დაკმაყოფილებიდან ორი დღის ვადაში, მმართველ პარტიას შეუძლია წარადგინოს კომისიის ახალი წევრი. რადიო თავისუფლება ამ საკითხზე „ქართულ ოცნებასთან“ დაკავშირებას ცდილობდა. მათგან პასუხის მიღების შემთხვევაში, ტექსტი განახლდება. 2024 წლის საპარლამენტო არჩევნები 26 ოქტომბერს გაიმართება. პარლამენტში მოსახვედრად აუცილებელია პარტიამ 5%-იანი ბარიერი გადალახოს. წელს საზღვარგარეთ 42 ქვეყნის 53 ქალაქში შექმნილია 67 საარჩევნო უბანი. ...