გამოცემა Financial Times-თან ინტერვიუში უკრაინის პრეზიდენტმა ვოლოდიმირ ზელენსკიმ განაცხადა, რომ ენერგეტიკულ ობიექტებზე თავდასხმების ორმხრივად შეწყვეტა შესაძლოა გახდეს უკრაინაში აქტიური საბრძოლო მოქმედების დასასრულებლად გადადგმული პირველი ნაბიჯი. „მშვიდობის პირველ სამიტზე ჩვენ ვნახეთ, რომ ენერგოუსაფრთხოების საკითხის გადაწყვეტა შესაძლებელია. სხვაგვარად რომ ვთქვათ, ჩვენ არ ვესხმით მათ ენერგეტიკულ ინფრასტრუქტურას, ისინი - ჩვენსას. შესაძლებელი გახდება ამით თუ არა ამ ომის ცხელი ფაზის დასრულება? დიახ, ვფიქრობ, რომ კი“, - განაცხადა ზელენსკიმ გამოცემის ჟურნალისტთან საუბარში. მანვე დაამატა, რომ რუსეთმა უნდა შეწყვიტოს უკრაინულ პორტებში სატვირთო გემებზე თავდასხმა. გაეროს მონაცემებით, მხოლოდ 1 სექტემბრიდან მოყოლებული, უკრაინის შავი ზღვის პორტებში რუსეთის დაბომბვის შედეგად დაზიანდა ექვი სამოქალაქო გემი და მარცვლეულის მტვირთავი ინფრასტრუქტურა. ზელენსკის სიტყვებით, „როდესაც ენერგეტიკასა და თავისუფალ ნაოსნობაზეა საუბარი, ამ პუნქტებთან დაკავშირებით რუსეთის მხრიდან მიღწეული შედეგი იქნებოდა სიგნალი, რომ შესაძლოა რუსეთი ომის დასრულებისთვის იყოს მზად“. ამასთან, ზელენსკი დარწმუნებულია, რომ რუსეთი აშშ-ის არჩევნების შედეგებს ელოდება და მხოლოდ ამის შემდეგ მიიღებს გადაწყვეტილებას, წავიდეს თუ არა კიევთან მოლაპარაკებებზე. მანამდე The Washington Post-ი წერდა, რომ რუსეთი და უკრაინა კატარის შუამავლობით გეგმავდნენ განეხილათ შეთანხმება ენერგეტიკულ ობიექტებზე დარტყმების ორმხრივი შეწყვეტის შესახებ. მომავალი შეხვედრის მონაწილეები იმედოვნებდნენ, რომ ამ მოლაპარაკებებით შესაძლებელი იქნება ომის დასრულების შესახებ ყოვლისმომცველი შეთანხმების მიღწევა მომავალში. თუმცა, WP-ის წყაროების თანახმად, ის ჩაიშალა კურსკის ოლქში უკრაინის შეიარაღებული ძალების შეტევის შემდეგ. რუსეთს "არ გაუუქმებია მოლაპარაკებები, მათ თქვეს: მოგვეცით დრო", - განუცხადა ერთ-ერთმა თანამოსაუბრემ გაზეთს. "კურსკის შემდეგ რუსებმა უარი განაცხადეს", - თქვა სხვა წყარომ. უკრაინის ენერგეტიკული ინფრასტრუქტურა რუსული იერიშების მუდმივი სამიზნეა. რუსეთის პრეზიდენტმა ვლადიმირ პუტინმა უკრაინის ენერგეტიკულ ობიექტებზე განხორციელებულ იერიშებს "დემილიტარიზაციის" პროცესის ნაწილი უწოდა, რადგან ისინი უკრაინის სამხედრო-სამრეწველო კომპლექსზე გავლენას ახდენენ. პუტინმა ასევე განაცხადა, რომ რუსეთი "იძულებულია" უპასუხოს უკრაინის მხრიდან მის ენერგეტიკულ ობიექტებზე განხორციელებულ თავდასხმებს. ბოლო თვეების განმავლობაში, რუსეთის ტერიტორიაზე რამდენიმე ნავთობგადამამუშავებელი ქარხანა გახდა უკრაინული დრონების თავდასხმის ობიექტი. ...