პერსონალურ მონაცემთა დაცვის სამსახურმა მედიაში გამოქვეყნებული ცნობის საფუძველზე წინასაარჩევნოდ ამომრჩევლებისთვის პირადობის მოწმობების ჩამორთმევის ფაქტების შესწავლა დაიწყო. სამსახური „ბათუმელების“ მიერ გამოქვეყნებულ სტატიაზე მიუთითებს. „ქართული ოცნება“ თავის პარტიულ ოფისებში „წინასაარჩევნოდ დეტალურად ამუშავებს ათობით ათასი ადამიანის შესახებ განსაკუთრებული კატეგორიის პირად მონაცემებს“, - დაწერა 15 ოქტომბერს „ბათუმელებმა“, „ინფორმირებული პირის“ მიერ მიწოდებულ დოკუმენტებზე დაყრდნობით. „ბათუმელების“ ინფორმაციით, მმართველ პარტიას მოქალაქეების პერსონალურ მონაცემებს, სავარაუდოდ, აწვდიან სახელმწიფო უწყებები, მათ შორის იუსტიციის, ჯანდაცვის, განათლების, შინაგან საქმეთა სამინისტროები. სტატიაში აღწერილი სქემის თანახმად, პერსონალური მონაცემების დამუშავების შედეგად დგინდება ამა თუ იმ პირის მიერ განვლილი გზა და საჭიროებები. მაგალითად: არის თუ არა ის დასაქმებული, არის თუ არა შემწეობის, სუბსიდიის ან რაიმე სახის კომპენსაციის ბენეფიციარი, ყოფილა თუ არა ოდესმე პატიმარი ან პრობაციონერი, არის თუ არა ნარკოტიკების მომხმარებელი. „ბათუმელები“ წერს, რომ „ქართულ ოცნებას“ დათვლილი აქვს სხვადასხვა კატეგორიაში გაერთიანებული ადამიანების რაოდენობა და დაკონკრეტებული აქვს მათ შორის „ქართული ოცნების“ მხარდამჭერები. „ბათუმელების“ თანახმად, ცხრილებშია „გავლენის მქონე პირის“ სვეტიც და ერთ ამომრჩეველზე, რიგ შემთხვევებში, მიწერილია რამდენიმე "გავლენის მქონე პირი", რომლებსაც, როგორც ჩანს, არამომხრე ან გადაუწყვეტელ ამომრჩევლებთან მუშაობა ევალებათ. ასეთ პირებად განიხილებიან როგორც ადამიანები, აგიტატორები, ასევე სახელმწიფო უწყებები და კომპანიები. გარდა ამისა, პერსონალურ მონაცემთა დაცვის სამსახური ეხმიანება სხვადასხვა წყაროს მეშვეობით გასაჯაროებულ ინფორმაციას, რომელიც შეეხება საარჩევნო პერიოდში ამომრჩევლებისთვის პირადობის დამადასტურებელი დოკუმენტების ჩამორთმევის ფაქტებს. სამსახური აღნიშნავს, რომ პირადობის მოწმობის ჩამორთმევის საკითხზე რეაგირება მათ კომპეტენციას სცდება. „აღსანიშნავია, რომ პერსონალურ მონაცემთა დაცვის სამსახურს გააჩნია საზედამხედველო ფუნქცია - გააკონტროლოს საქართველოში „პერსონალურ მონაცემთა დაცვის შესახებ“ საქართველოს კანონით დადგენილი წესების შესრულება, ხოლო სისხლის სამართლის კოდექსით განსაზღვრულ დანაშაულის შემცველ ქმედებებს შეისწავლიან და რეაგირებას ახდენენ სამართალდამცავი ორგანოები. მოცემულ შემთხვევაში, ვინაიდან ამომრჩევლებისთვის პირადობის დამადასტურებელი დოკუმენტების ჩამორთმევა სავარაუდოდ საქართველოს სისხლის სამართლის კოდექსით გათვალისწინებულ ქმედებას წარმოადგენს, მასზე რეაგირება სცდება სამსახურის კომპეტენციის ფარგლებს და სამართალდამცავი ორგანოების ფუნქციას განეკუთვნება“, -...