საფრანგეთში, პარიზში, 24 ოქტომბერს იმართება საერთაშორისო კონფერენცია, რომელიც ლიბანში შექმნილ ვითარებას ეხება. საფრანგეთის ინიციატივით ორგანიზებული კონფერენციის მიზანია გასაჭირში მყოფი მოსახლეობისთვის დახმარების გამოყოფა და ქმედითი სახელმწიფო სისტემის შექმნა, - იტყობინება საფრანგეთის საგარეო საქმეთა სამინისტრო. კონფერენციაში მონაწილეობს 70-მდე სახელმწიფო, ასევე - საერთაშორისო ორგანიზაციების წარმომადგენლები. ლიბანის მოკავშირე ქვეყნები პარიზში წარმოდგენილი არიან მინისტრების დონეზე, კონფერენციაზე არიან ასევე გაეროსა და ევროკავშირის წარმომადგენლები. ისრაელი, რომელიც ლიბანში ჰეზბოლას წინააღმდეგ ყოველდღიურად ახორციელებს საჰაერო იერიშებს, მოითხოვს, რომ გაეროს 1701-ე რეზოლუციის თანახმად, ჰეზბოლამ ქვეყნის საზღვრიდან 30 კმ-ში დაიხიოს უკან, მდინარე ლითანის მიღმა. ისრაელს ასევე სურს, კვლავ შინ დაბრუნდნენ თავისი მოქალაქეები, რომლებიც ისრაელის ჩრდილოეთიდან ქვეყნის სიღრმეში არიან ევაკუირებული. ჰეზბოლა არის აშშ-ში ტერორისტულ დაჯგუფებად აღიარებული ორგანიზაცია, რომლის მხოლოდ სამხედრო ფრთაა "შავ სიაში" შეტანილი ევროკავშირში. ჰეზბოლას პოლიტიკური ნაწილის წარმომადგენლები ლიბანის პარლამენტის წევრები არიან. ...