რადიო თავისუფლებასთან საუბარში პროტესტის ერთ-ერთი მონაწილე თორნიკე ლაბაძე ამბობს, რომ ხელისუფლების წარმომადგენლებთან ერთად მოლაპარაკება კომპანიასთან წარუმატებლად დასრულდა. "სახელმწიფოს წარმომადგენლებთან მოლაპარაკება იყო, ["ქართული ოცნების" დეპუტატი] რატი იონათამიშვილი იყო მისული ამ ადამიანებთან. ვერაფერზე ვერ შეთანხმდნენ, დროს წელავდა უბრალოდ. გაუგზავნეს ყველანაირი ხელშეკრულება, რაზეც ხალხი იყო თანახმა და როგორც უნდა მომხდარიყო ანაზღაურების წესი და საერთოდ არაფერზე არ დაეთანხმნენ, ისევ კომპანიის ინტერესებს იჭერენ. აზრი არ ჰქონდა [თბილისში დარჩენას]. შიმშილობაც მაგ ადამიანის [რატი იონათამიშვილის] დაპირების შემდეგ შეწყდა და რაღაც ქმედით ნაბიჯებს ელოდნენ. გუშინაც დარეკეს, რომ უნდა შეთანხმებულიყვნენ, ყველაფერი მზად არისო, მაგრამ არ შედგა შეთანხმება", - ამბობს ის. თორნიკე ლაბაძის თქმითვე, სოფელში დაბრუნების შემდეგ მაღაროს პიკეტირებას გააგრძელებენ და არ მისცემენ კომპანიას მუშაობის აღდგენის შესაძლებლობას. "სოფლის ქვემოთ გამოიმუშავეს მადანი, ნგრევა დაწყებულია და ყველაფერი დაინგრევა, მაგრამ მაინც, ზედმეტი ნგრევა რომ არ გამოიწვიოს". 14 ოქტომბერს პროტესტის მონაწილე შუქრუთელების ნაწილმა 43-დღიანი შიმშილობა შეწყვიტა. ეს გადაწყვეტილება მათ მას შემდეგ მიიღეს, რაც აქციის მონაწილეებთან პარლამენტარი რატი იონათამიშვილი მივიდა და კომპანიასთან მოლაპარაკებებში შუამავლობა შესთავაზა. ამის შემდეგ ერთმანეთს შეხვდნენ მოშიმშილეები, კომპანიის წარგზავნილები და სახელმწიფოს წარმომადგენლები. ბოლო დღეების განმავლობაში მოშიმშილე შუქრუთელებს არაერთხელ დასჭირდათ სასწრაფო დახმარება. უამინდობის მიუხედავად, აქციის მონაწილეებს პოლიცია კარვების გაშლის უფლებას არ აძლევდა და ისინი ღამეს ღია ცის ქვეშ ათენებდნენ. საპროტესტო აქცია ჭიათურაში, სოფელ შუქრუთში, კოროხნალის მაღაროსთან, რამდენიმე თვის წინათ დაიწყო. აქციის მონაწილეების თქმით, სოფელში საცხოვრებელი სახლები ინგრევა, რაც მადნის მოპოვებით სამუშაოებს უკავშირდება. შუქრუთელები მიყენებული ზიანის ანაზღაურებას ითხოვენ. პროტესტმა თბილისში 11 სექტემბერს გადმოინაცვლა. ჭიათურის სამთო-მოპოვების მმართველი კომპანია, „ჭიათურა მენეჯმენტ კომპანია“, აცხადებს, რომ გაცემული აქვს 12 მლნ ლარზე მეტი ოდენობის კომპენსაცია და აქციის ორგანიზატორებს კომპენსაცია სრულად აქვთ აღებული. შუქრუთელების თქმით, სიმართლეს არ შეესაბამება დასახლებული თანხის ოდენობა, ზოგი ოჯახის მიერ მიღებული თანხა კი ავანსი იყო, სამხარაულის ექსპერტიზის ბიუროს მიერ დასკვნის გამოქვეყნებამდე. საბოლოო კომპენსაციის ოდენობა კი დასკვნის გამოქვეყნების შემდეგ უნდა გამოანგარიშებულიყო, თუმცა კომპანია დასკვნას არ ასაჯაროებს. renderExternalContent("//www.radiotavisupleba.ge/embed/playe...