„27 ოქტომბერს გადააცილეს [პარალელური დათვლის შედეგების] გამოქვეყნების დრო, გამეორდა 2020 წლის სცენარი, მაშინაც დააგვიანეს პარალელური დათვლის შედეგების გამოქვეყნება. მათი მეთოდოლოგიით, ეუთოს ანგარიშამდე, 12:00 საათზე აქვეყნებენ შედეგებს და მაშინაც გადააცილეს. იმიტომ, რომ აყალბებდნენ პარალელური დათვლის შედეგებს და ვერ გადაეწყვიტათ, რა შედეგები დაესვათ ზუსტად. წელსაც ISFED ზუსტად იგივე სკანდალში გაეხვია, როგორც 2020 წლის გაყალბების სკანდალი იყო. მას შემდეგ, რაც მოიკითხა სხვადასხვა სუბიექტმა, რა ხდება პარალელურ დათვლასთან დაკავშირებით, მათ საბოლოოდ 27 ოქტომბერს, გვიან ღამით გაავრცელეს განცხადება და თქვეს, რომ მათი დათვლის შედეგები ემთხვევა ცესკოს შედეგებს, თუმცა დანარჩენი დეტალები დამალეს და არ უნდათ, რომ საზოგადოებას აცნობონ. ამიტომ მოვითხოვთ, ISFED-მა სრულად გაასაჯაროოს პარალელური დათვლის შედეგები“, - განაცხადა შალვა პაპუაშვილმა. ასევე ნახეთ არჩევნები 2024 - ლაივბლოგი 26 ოქტომბრის არჩევნების დღის დაკვირვების შემაჯამებელ განცხადებაში წერია, რომ ISFED-ის შეფასებით, საპარლამენტო არჩევნების შედეგები შესაძლოა სათანადოდ არ ასახავდეს ქართველი ამომრჩევლების ნებას. რაც შეეხება პარალელური დათვლის შედეგებს, იგი აცხადებს: „ორგანიზაციის მიერ ჩატარებული ხმების პარალელური დათვლის შედეგების ვერიფიკაცია შეესაბამება საქართველოს ცენტრალური საარჩევნო კომისიის მიერ გამოცხადებულ შედეგებს, თუმცა, იგი ვერ იქნება გამოყენებული, როგორც საარჩევნო პროცესის ვალიდურობის საზომი, ვინაიდან წინასაარჩევნო პერიოდში და არჩევნების დღეს დაფიქსირებულმა ფუნდამენტური ხასიათის დარღვევებმა გავლენა მოახდინა ამომრჩევლის თავისუფალი ნების გამოვლენაზე“. „სამართლიანმა არჩევნებმა“ მიუთითა წინასაარჩევნო პერიოდში გამოვლენილი დარღვევების შესახებაც და აღნიშნა, რომ ამომრჩევლებზე ზეწოლამ, დაშინებამ, პირადობის დამადასტურებელი მოწმობების ჩამორთმევამ, პერსონალური მონაცემების შეგროვებამ/დამუშავებამ და ამომრჩევლების მოსყიდვამ მნიშვნელოვნად დააზიანა არჩევნების მიმართ ნდობა. არჩევნების დღეს კი, როგორც ორგანიზაცია წერს, გამოავლინა მძიმე დარღვევები: ბიულეტენების ჩაყრა, ხმის მრავალჯერადი მიცემა, ამომრჩევლის უპრეცედენტო მასშტაბის მოსყიდვა, დამკვირვებლების უბნებიდან გაძევება, ასევე უბნის გარეთ ამომრჩეველთა მობილიზების, მათი პერსონალური მონაცემების შეგროვებისა და ნების კონტროლის ფაქტები. „სამართლიანი არჩევნების” შეფასებით, „ამ დარღვევების ერთობლიობის გათვალისწინებით, შედეგები შესაძლოა არ ასახავდეს ამომრჩევლის ნებას. აქედან გამომდინარე, ორგანიზაცია ხმების პარალელურ დათვლის დეტალური შედეგების გამოქვეყნებას არ გეგმავს. „სამართლიანი არჩევნები” განაგრძობს საარჩევნო პროცესების მონიტორინგს და ანალიზს“. ...