გაეროს უშიშროების საბჭო დათანხმდა, თეირანის თხოვნით საგანგებო სხდომა ჩაატაროს მას შემდეგ, რაც 26 ოქტომბერს დილით ისრაელმა სარაკეტო იერიში განახორციელა ირანის წინააღმდეგ. შვეიცარიის მისიამ, რომელიც საბჭოს მორიგი თავმჯდომარეა, განაცხადა, რომ სხდომა 28 ოქტომბერს გაიმართება თეირანის თხოვნით და რუსეთის, ჩინეთისა და ალჟირის მხარდაჭერით. მანამდე, 27 ოქტომბერს, თეირანმა უშიშროების საბჭოს მიმართა რიგგარეშე სხდომის გამართვის თხოვნით, რათა ისრაელი დაიგმოს ავიადარტყმებისთვის. ისრაელის ეს ავიადარტყმები პასუხი იყო ირანის მიერ მიმდინარე თვის დამდეგს ისრაელის წინააღმდეგ განხორციელებულ სარაკეტო იერიშზე. ირანის წარგზავნილმა გაეროში, ამირ საიდ ირავანიმ, უშიშროების საბჭოსთვის გაგზავნილ წერილში განაცხადა, რომ ისრაელის „უკანონო და აგრესიული მოქმედებები“ წარმოადგენს ირანის სუვერენიტეტისა და ტერიტორიული მთლიანობის და „საერთაშორისო სამართლისა და გაეროს წესდების უხეშ დარღვევას“. მართალია, ირავანი და სხვა ლიდერები თეირანში ამტკიცებდნენ, რომ ირანის თავდაცვამ დაიჭირა ისრაელის მიერ გაშვებული ჭურვების უდიდესი ნაწილი, მაგრამ მათ ასევე განაცხადეს, რომ თავდასხმის შედეგად დაიღუპა ირანის ოთხი სამხედრო ოფიცერი. ისრაელის ელჩმა გაეროში, დენი დანონმა, გააკრიტიკა ირანის განცხადებები და თქვა, რომ თეირანი „ცდილობს, დიპლომატიურ არენაზე ჩვენ წინააღმდეგ იმოქმედოს სასაცილო მტკიცებით იმის შესახებ, რომ ისრაელმა საერთაშორისო სამართალი დაარღვია“. ასევე ნახეთ ირანი აცხადებს, რომ ისრაელის დარტყმას ორი სამხედრო ემსხვერპლა ...