რუსეთის თავდაცვის სამინისტრომ სამშაბათს გამოაცხადა რუსეთის ჯარების მიერ უკრაინის დონეცკის ოლქის ქალაქ სელიდოვოს დაკავების შესახებ. ეს არის ქალაქი პოკროვსკის სამხრეთით, ოლქის დასავლეთ ნაწილში, სადაც ომამდელი მოსახლეობა დაახლოებით 25 ათასი ადამიანი იყო. უკრაინის შეიარაღებული ძალების გენერალურ შტაბს ჯერ არ დაუდასტურებია ქალაქის დაკარგვა, თუმცა, მრავალმა წყარომ, როგორც რუსულმა, ისე უკრაინულმა, გასულ კვირაში გაავრცელა ინფორმაცია მის ცენტრალურ უბნებში რუსეთის სამხედროების გარღვევისა და უკრაინის ძალების გარეუბნებში უკან დახევის შესახებ. გამოქვეყნდა ქალაქში რუსეთის ჯარისკაცებისა და დროშების ფოტოები და ვიდეოები. სელიდოვო ყველაზე დიდი დასახლებაა ზამთარში აღებული ავდეევკის შემდეგ, რომლის დაკავებაც ოფიციალურად გამოაცხადა რუსეთის თავდაცვის სამინისტრომ. შემომავალი ინფორმაციით, რუსეთის ჯარები აგრძელებენ შეტევას სელიდოვოს სამხრეთით, ქალაქ კურახოვოს მიმართულებით. მეორე დარტყმა კურახოვოს მიმართულებით ხორციელდება სამხრეთიდან, ახლახან აღებული უგლედარის მხრიდან. სამშაბათს რუსეთის თავდაცვის სამინისტრომ განაცხადა, რომ რუსეთის ჯარებმა ამ მიმართულებით დაიკავეს დასახლებები კატერინოვკა და ბოგოიავლენკა, ასევე სოფელი გორნიაკი კურახოვოს ჩრდილოეთით. უკრაინული წყაროები, კერძოდ, პროექტი DeepState, იტყობინებოდა იქ ბოლო დღეებში მიმდინარე ბრძოლების შესახებ. რამდენიმე რუსული არხი ასევე იუწყება სამხრეთ ფლანგზე რუსეთის ჯარების უფრო ღრმა გარღვევის შესახებ. ამ განცხადებების დამოუკიდებელი წყაროებით დადასტურება ჯერ ვერ ხერხდება. ანალიტიკოსები აღნიშნავენ, რომ ბოლო დროს დონეცკის ოლქში რუსეთის ჯარების წინსვლის ტემპი დაჩქარდა. გერმანული გაზეთი Zeit-ი სამშაბათს წერს, რომ ოქტომბერში რუსეთის ჯარებმა მოახერხეს უკრაინის ტერიტორიის 478 კვადრატულ კილომეტრზე კონტროლის დაწესება. ეს ყველაზე მაღალი მაჩვენებელია 2022 წლის მარტის მერე, რუსეთის ფართომასშტაბიანი შეჭრის მეორე თვის შემდეგ. მხოლოდ გასული კვირის განმავლობაში რუსეთის სამხედროებმა უკრაინის ტერიტორიის თითქმის 200 კვადრატული კილომეტრი დაიკავეს. ამასთან, უკრაინის სამხედროები აგრძელებენ რუსეთის ტერიტორიის ნაწილის კონტროლს კურსკის ოლქში. რუსეთის შეტევა იქ ბოლო კვირებში კვლავ დაბრკოლდა. უკრაინის ჯარებს უკავიათ რეგიონული ცენტრი სუჯა და რამდენიმე მიმდებარე დასახლება. ასევე ნახეთ ინტერაქტიური რუკა: უკრაინის ჯარების შესვლა კურსკის ოლქში ...