ჩეჩნეთის მეთაურმა რამზან კადიროვმა უკრაინა დაადანაშაულა ქალაქ გუდერმესში მდებარე, პუტინის სახელობის „სპეცდანიშნულების უნივერსიტეტზე“ დრონით თავდასხმაში. „შეტევის შედეგად ჩვენი მხრიდან მსხვერპლი არ არის, მაგრამ მსხვერპლია უკრაინელ ტყვეებს შორის... კიევმა, რომელიც ჩვენთვის ზიანის მოყენებას ცდილობდა, თავისივე ჯარისკაცები დაღუპა“, - დაწერა 29 ოქტომბერს, გვიან ღამით კადიროვმა ტელეგრამ-არხზე. არცერთი სხვა წყაროთი ეს ინფორმაცია დადასტურებული არ არის. ჩეჩნეთის მმართველი ირწმუნება, რომ რესპუბლიკის „ყველა სტრატეგიულ ობიექტზე" ჰყავთ „ათამდე უკრაინელი ტყვე“ და ასეთ ობიექტებს შორისაა „სპეცდანიშნულების უნივერსიტეტიც“, რომელსაც კადიროვმა „მაღალეფექტიანი მებრძოლების სამჭედლო“ უწოდა. ასევე ნახეთ კადიროვი „სპეცდანიშნულების უნივერსიტეტზე“ დრონით შეტევის შესახებ იუწყება რუსეთის ჩეჩნეთის რესპუბლიკის მეთაურმა პირველად 29 ოქტომბერს, დილით განაცხადა, რომ უპილოტო საფრენი აპარატით შეტევა იყო ქალაქ გუდერმესში მდებარე „სპეცდანიშნულების უნივერსიტეტის“ ტერიტორიაზე, სადაც „ცარიელი შენობის სახურავს“ გაუჩნდა ცეცხლი, რომელიც უკვე ჩააქრეს და არავინ დაშავებულა. დილით კადიროვს არ დაუკონკრეტებია, ვინ განახორციელა ეს შეტევა. რუსეთის თავდაცვის სამინისტროს ჩეჩნეთზე დრონით თავდასხმის შესახებ არაფერი უთქვამს. 29 ოქტომბერს უკრაინის საზოგადოებრივ მაუწყებელს სპეცსამსახურებში დაუდასტურეს, რომ ჩეჩნეთზე დრონით შეტევა იყო და აპარატი, სავარაუდოდ, დაღესტნიდან ან ინგუშეთიდან იყო გაშვებული. ასევე ნახეთ რა ელით უკრაინის ტყვეობიდან დაბრუნებულ ჩეჩენ მებრძოლებს? რუსეთის სახელმწიფო სააგენტო „ტასის“ ინფორმაციით, გუდერმესში მდებარე „რუსეთის სპეცდანიშნულების უნივერსიტეტი“ 95 შენობისგან შემდგარი კომპლექსია, სადაც მიმდინარეობს საცეცხლე, ტაქტიკური, საჰაერო-სადესანტო და სხვა სახის მომზადება. სააგენტოს თანახმად, „სპეციალური სამხედრო ოპერაციის“ დაწყების შემდეგ ამ ბაზაზე მოამზადეს 19 ათასზე მეტი მოხალისე. რუსეთის ხელისუფლება „სპეციალურ სამხედრო ოპერაციას“ უწოდებს უკრაინის წინააღმდეგ ფართომასშტაბიან ომს. ...