აშშ "ღრმად შეშფოთებულია" ისრაელის პარლამენტის მიერ დამტკიცებული კანონით, რომელიც კრძალავს UNRWA-ს, გაეროს მთავარ სააგენტოს, რომელიც ეხმარება პალესტინელებს ღაზის სექტორსა და ახლო აღმოსავლეთის სხვა არეალებში, მათ შორის ისრაელში. ამ კანონით, UNRWA-ს ეკრძალება ისრაელში ნებისმიერი ფორმით მოქმედება, იკრძალება ასევე ნებისმიერი კონტაქტი ისრაელის ხელისუფლებასა და გაეროს ამ ჯგუფს შორის. აშშ-ის სახელმწიფო დეპარტამენტის პრესმდივანმა მეთიუ მილერმა თქვა, რომ ვაშინგტონმა მკაფიოდ გამოხატა თავისი შეშფოთება და წინააღმდეგობა ისრაელის მიერ მიღებული კანონის მიმართ. "ღრმად შეშფოთებული ვართ ამ კანონით. ამან შესაძლოა ბოლო მოუღოს UNRWA-ის მუშაობას დასავლეთის სანაპიროზე, ღაზაში და აღმოსავლეთ იერუსალიმში, - თქვა მილერმა 29 ოქტომბერს გამართულ ბრიფინგზე, - ეს საფრთხეს უქმნის მილიონობით პალესტინელს, რომლებიც UNRWA-ს ეყრდნობიან აუცილებელი სერვისებისთვის, მათ შორის ჯანდაცვის და დაწყებითი და შუა კლასების განათლებისთვის". კანონი ისრაელის პარლამენტმა 28 ოქტომბერს დაამტკიცა, ის ძალაში 90 დღეში შევა. ღაზაში მცხოვრებ პალესტინელებზე მძიმედ აისახა ომი ისრაელსა და ირანის მიერ მხარდაჭერილ ჰამასს შორის, რომელსაც აშშ და ევროკავშირი ტერორისტულ ორგანიზაციად მიიჩნევენ. ომს ბიძგი მისცა 2023 წლის 7 ოქტომბერს ჰამასის მებრძოლთა თავდასხმამ ისრაელზე, რის შედეგადაც მოკლულია 1200-მდე პირი, ღაზის სექტორში ტყვედ წაიყვანეს 251-მდე ადამიანი. ისრაელის საპასუხო შეტევამ ღაზა გააჩანაგა -ჰამასის მიერ მართული ჯანდაცვის უწყების ცნობით, მოკლულია 40 000-ზე მეტი ადამიანი. UNRWA ბევრჯერ გამოვიდა გაფრთხილებით, რომ ომის შედეგად ღაზა ჰუმანიტარული კრიზისის ზღვარზეა. ისრაელის პარლამენტარებმა UNRWA აკრძალეს - ისინი აცხადებენ, რომ სააგენტოში ჰამასის წარმომადგენლებმა შეაღწიეს და რომ UNRWA-ის თანამშრომელთა ნაწილი 7 ოქტომბრის თავდასხმაში იყო ჩართული. გაერომ აგვისტოში თქვა, რომ ისრაელის წინააღმდეგ გასული წლის 7 ოქტომბერს განხორციელებულ თავდასხმასთან შესაძლო კავშირისთვის სამსახურიდან გაათავისუფლა UNRWA-სთვის მომუშავე ცხრა პირი. დამტკიცებული კანონით, UNRWA-ის ჰუმანიტარული მუშაობა ფაქტობრივად შეუძლებელი იქნება ღაზასა და ისრაელის მიერ ოკუპირებულ დასავლეთის სანაპიროზე. ასევე ნახეთ გაერო ისრაელს აკრიტიკებს გაეროს ლტოლვილთა სააგენტოს აკრძალვის გამო ...