ლიბანის რადიკალური დაჯგუფება ჰეზბოლას ახალმა ლიდერმა, ნაიმ ყასემმა განაცხადა, რომ ისრაელის იერიშის შედეგად მისი წინამორბედის, ჰასან ნასრალას სიკვდილი დაჯგუფებისთვის სერიოზული დარტყმაა. მაგრამ ორგანიზაციამ შეძლო მოკლე დროში აღედგინა ძალები და გადაწყვეტილი აქვს წინააღმდეგობა გაუწიოს ისრაელს. ყასემის სიტყვებით, ჰეზბოლა არ მოითხოვს ცეცხლის შეწყვეტას და ისრაელთან ომს საკუთარი პირობებით დაასრულებს. „ჩემი სამუშაო გეგმა ნასრალას გეგმაა. გავაგრძელებთ მისი და ჰეზბოლას ხელმძღვანელობის მიერ შემუშავებულ ომის გეგმას,“ თქვა ყასემმა. დაჯგუფების ხელმძღვანელმა ასევე გაიხსენა ისრაელის პრემიერ-მინისტრ ბენიამინ ნეთანიაჰუს სახლზე უპილოტო საფრენი აპარატის იერიში. ყასემმა თქვა, რომ „ამჯერად ის გადარჩა, მაგრამ უცნობია, როდის მოკვდება ის“, მიანიშნა რა, რომ პრემიერი ერთ-ერთი თავისი გამოსვლის დროს შეიძლება დაიღუპოს. ისრაელის მედია თავის მხრივ იტყობინება, რომ ნეთანიაჰუ უსაფრთხოების მოსაზრებების გამო ფიქრობს გადადოს თავისი უმცროსი ვაჟის ქორწილი. ღონისძიება 26 ნოემბრისთვის არის დაგეგმილი. ასევე ნახეთ ჰეზბოლას ახალი ლიდერი გახდა შეიხი ნაიმ ყასემი გარდა ამისა, პრემიერ-მინისტრის აზრით, აუცილებელია ქნესეთის გადატანა სხვა შენობაში. ტელეარხი Kan 11 აღნიშნავს, რომ ნეთანიაჰუს ყველაზე მეტად აშფოთებს დრონების საფრთხე. 19 ოქტომბერს ჩრდილოეთ ისრაელში, ქალაქ კესარიაში, დრონმა შეუტია ნეთანიაჰუს სახლს. პრემიერი და მისი მეუღლე შინ არ იმყოფებოდნენ, არავინ დაშავებულა. აშშ-სა და ისრაელში ჰეზბოლა ტერორისტულ ორგანიზაციად არის აღიარებული, ევროკავშირში კი - მხოლოდ მისი გასამხედროებული ფრთა. ლიბანში ეს მოძრაობა მოქმედებს როგორც კანონიერი პოლიტიკური პარტია და პარლამენტში არის წარმოდგენილი. ჰასან ნასრალა 32 წლის განმავლობაში ხელმძღვანელობდა ჰეზბოლას. ისრაელის თავდაცვის არმიის ცნობით, ის სექტემბრის ბოლოს მოკლეს. ნასრალა დაიღუპა ბეირუთში, დაჯგუფების ცენტრალურ შტაბზე ისრაელის გამანადგურებლების იერიშის შედეგად. ...