გავრცელებულ ტექსტში ვკითხულობთ, რომ ისინი უერთდებიან მოწოდებებს საქართველოს ხელისუფლების მიმართ, "დეტალურად და მიუკერძოებლად" გამოიძიონ საარჩევნო დარღვევებთან დაკავშირებული ინფორმაცია. "ჩვენ ვუერთდებით საერთაშორისო მოწოდებებს, დეტალურად და მიუკერძოებლად გამოიძიონ 26 ოქტომბრის საპარლამენტო არჩევნებამდე და არჩევნების დღეს დარღვევებზე გავრცელებული ცნობები. არსებითად მნიშვნელოვანია საარჩევნო პროცესის პატიოსნებასთან დაკავშირებული ეჭვების გაფანტვა", - წერია განცხადებაში. გარდა ამისა, ისინი აცხადებენ, რომ "მტკიცედ" უჭერენ მხარს საქართველოს ევროატლანტიკური ინტეგრაციის მიზანს, "რომელიც საერთო, ფუნდამენტურ ღირებულებებზეა დამოკიდებული". "ბოლო წლებში "მზარდი შეშფოთებით" ვაკვირდებით საქართველოს პოლიტიკურ ტრაექტორიას. საქართველოს მთავრობის მიერ გატარებული პოლიტიკა და მიღებული კანონები მზარდად შორდებოდა ევროპული და ევროატლანტიკური ინტეგრაციის გზას. კანონის უზენაესობისა და დემოკრატიული არჩევნების დაცვას არსებითი მნიშვნელობა აქვს საქართველოს ევროკავშირის გზაზე ნებისმიერი პროგრესისთვის. ჩვენ გულწრფელად ვიმედოვნებთ, რომ საქართველო დაუბრუნდება იმ გზას, რომელიც მიიყვანს მას ევროპულ და ევროატლანტიკურ ოჯახში. ჩვენ კვლავ ყურადღებით დავაკვირდებით საქართველოში განვითარებულ მოვლენებს და საქართველოს ხელისუფლებას მისი ქმედებების მიხედვით შევაფასებთ". ასევე ნახეთ "არჩევნების გამოძიება, დისკრიმინაციული კანონების გაუქმება" - ბორელი ევროკავშირთან დაახლოების გზებზე საუბრობს ცესკოს წინასწარი მონაცემებით, 26 ოქტომბრის საპარლამენტო არჩევნებში გამარჯვება „ქართულმა ოცნებამ“ მოიპოვა ხმების 53,93%-ით. არცერთი მსხვილი ოპოზიციური პარტია არ აღიარებს შედეგებს და გაყალბებაზე საუბრობს. არჩევნების წინასწარ შედეგებს არ აღიარებს "ერთიანობა - ნაციონალური მოძრაობა". კოალიცია "ძლიერი საქართველოს" ლიდერების განცხადებით, ისინი არ აპირებენ არჩევნების გამოცხადებულ შედეგებთან შეგუებას. "კოალიცია ცვლილებებისთვის" უარს ამბობს საპარლამენტო მანდატებზე და არჩევნების შედეგებს "გაყალბებულად და არალეგიტიმურად" მიიჩნევს. პარტია "გახარია საქართველოსთვის" აცხადებს, რომ 26 ოქტომბრის არჩევნების დღეს გამოვლენილ დარღვევებს პირდაპირი გავლენა ჰქონდა შედეგებზე. ...