სამმა ოპოზიციურმა ძალამ 4 ნოემბერს რუსთაველზე საპროტესტო აქცია დააანონსა, როგორც პარტია "ლელოს" ოფისში გამართულ ერთობლივ ბრიფინგზე განაცხადეს "ძლიერი საქართველოს" , კოალიცია "ცვლილებისთვის" და "ერთიანობა - ნაციონალური მოძრაობის" ლიდერებმა მათი მიზანი "შედეგზე ორიენტირებული გააზრებული აქციებია გამარჯვების დასაბრუნებლად". მათი განცხადებით, შექმნილია საკოორდინაციო შტაბიც, რომელშიც ჩართვის და აქციების დაგეგმვაში მონაწილეობა შესაძლებლობა საზოგადოების ყველა აქტიურ ჯგუფს ექნება. ამასთან, მათი თქმით, მუშაობენ საერთაშორისო პარტნიორებთანაც "გაყალბების სქემების" მიწოდებაზე. ასევე გამოვლენილი და დასჯილი იქნება ყველა ვინც ამ სქემებში მონაწილეობდა. ოპოზიციური პოლიტიკური პარტიის ლიდერების განცხადებით აქცია თბილისში, რუსთაველის გამზირზე 4 ნოემბერს, საღამოს 19:00 საათზე გაიმართება. три 26 ოქტომბრის საპარლამენტო არჩევნების წინასწარი ოფიციალური შედეგებით, პირველ ადგილზე ხმების 50%-ზე მეტით მმართველი პარტია „ქართული ოცნებაა“. 5%-იანი ბარიერი გადალახა ოთხმა ოპოზიციურმა პოლიტიკურმა გაერთიანებამ. „ქართული ოცნება“ - 53,931%; "კოალიცია ცვლილებისთვის" - 11,035%; "ერთიანობა - ნაციონალური მოძრაობა" - 10,167%; "ძლიერი საქართველო" - 8,81%; "გახარია საქართველოსთვის" - 7,768%. ოპოზიციურმა პარტიებმა საპარლამენტო არჩევნების შედეგები გაყალბებულად გამოაცხადეს, არ აღიარეს და მოითხოვეს ახალი არჩევნები, რომელსაც საერთაშორისო საარჩევნო ადმინისტრაცია ჩაატარებს. არჩევნებს გაყალბებულად მიიჩნევს პრეზიდენტი სალომე ზურაბიშვილიც. „ქართული ოცნება" არჩევნების გაყალბებას უარყოფს და ოპოზიციურ პარტიებს და არასამთავრობო ორგანიზაციებს ადანაშაულებს ცილისწამების და დეზინფორმაციის მიზანმიმართულ კამპანიაში. ...