რადიო თავისუფლებამ გერმანიის ფედერალური პროკურატურის წყაროსგან შეიტყო, რომ გერმანიისა და რუსეთის მოქალაქე დიტერ ს. (მისი გვარი განაჩენის გამოტანამდე არ გახდება ცნობილი) ბრალად ედება „უცხოური ტერორისტული ორგანიზაციის დონეცკის სახალხო რესპუბლიკის“ საქმიანობაში მონაწილეობას. ამასთან, მას ბრალად ედება მძიმე ძალადობრივი დანაშაულის მომზადება, რომელიც საფრთხეს უქმნის სუვერენულ სახელმწიფოს. სისხლის სამართლის საქმე მიუნხენში მდებარე - ბავარიის უზენაეს სასამართლოში აღიძრა. პროკურატურა ბრალდებაში აღნიშნავს, რომ დიტერ ს., 2014 წლის დეკემბრიდან 2016 წლის აგვისტომდე, მონაწილეობდა აღმოსავლეთ უკრაინაში ბრძოლებში ე.წ. „დონეცკის სახალხო რესპუბლიკის“ („ДНР“) - დონბასელი სეპარატისტთა მხარეს, რომელსაც მხარს უჭერს რუსეთი - და ამასთან დაკავშირებით ფლობდა ცეცხლსასროლ იარაღს. გერმანიის ფედერალური პროკურატურის თანახმად, ე.წ. „დონეცკის სახალხო რესპუბლიკა“ არის "პრორუსული გაერთიანება, რომელიც 2014 წლიდან ახორციელებს კონტროლს უკრაინის ტერიტორიაზე მდებარე დონეცკის ოლქზე, სუვერენული სახელმწიფოსგან მისი გამოყოფის მიზნით“. "ДНР" გერმანიაში შერაცხილია დანაშაულებრივ ტერორისტულ გაერთიანებად. ასეთ ორგანიზაციებში მონაწილეობა ისჯება კანონით. ბრალდებული, სავარაუდოდ, იბრძოდა "DPR"-ის მხარეს 2014 და 2015 წლის ზამთარში დონეცკის აეროპორტში და 2015 წლის ივნისში ქალაქ მარინკაში. დიტერ ს. ასევე ეჭვმიტანილია ჯაშუშურ საქმიანობაში. თუმცა, პროკურატურის ინფორმაციით, მომხდართან დაკავშირებით გამოძიება ჯერ არ დასრულებულა. ბრალდებული 2024 წლის 17 აპრილს დააკავეს და წინასწარი დაკავების იზოლატორშია. ...