რუსეთის საგარეო საქმეთა მინისტრი სერგეი ლავროვი აპირებს დეკემბერში მალტას ეწვიოს და მონაწილეობა მიიღოს ეუთოს წევრი ქვეყნების მინისტრთა საბჭოს სხდომაში. ინფორმაცია გამოცემა „ვედომოსტის“ დაუდასტურა რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ. თუ მალტა ლავროვს მიიღებს, ეს იქნება ევროკავშირის წევრ სახელმწიფოში მისი პირველი ვიზიტი 2022 წლის თებერვლის, უკრაინაში რუსეთის არმიის ფართომასშტაბიანი შეჭრის შემდეგ. სერგეი ლავროვი იმ რუს მაღალჩინოსნებს შორისაა, რომლებსაც უკრაინის წინააღმდეგ ომის გამო ევროკავშირმა სანქციები დაუწესა. ზახაროვას განცხადებით, ქვეყანა, რომელიც ეუთოს შეხვედრას მასპინძლობს, ვალდებულია უზრუნველყოს ორგანიზაციის ყველა წევრი სახელმწიფოს მუშაობა. მოსკოვში მალტის საელჩოში „ვედომოსტის“ უთხრეს, რომ 5-6 დეკემბერს ეუთოს მინისტრთა საბჭოს სხდომის ჩატარების გადაწყვეტილება ეხება ყველა წევრს, მათ შორის რუსეთს და პრაქტიკული დეტალები, მათ შორის მიწვევა, შესაბამის დროს ეცნობება ეუთოს ყველა დელეგაციას. ლავროვის სანქცირების გამო შექმნილ ვითარებაზე საელჩოს კომენტარი არ გაუკეთებია. რუსეთის საგარეო საქმეთა მინისტრი ევროკავშირის წევრ სახელმწიფოში ბოლოს იმყოფებოდა 2021 წლის დეკემბერში და მაშინაც ეუთოს მინისტრთა საბჭოს სხდომაზე, რომელსაც შვედეთის დედაქალაქი სტოკჰოლმი მასპინძლობდა. ასევე ნახეთ ლავროვი ნიუ-იორკში ისევ გრძელი გზით ჩავიდა უკრაინაში ომის დაწყების შემდეგ რუსეთის საგარეო საქმეთა მინისტრი არაერთხელ იმყოფებოდა ნიუ-იორკში, გაეროს შტაბ-ბინაში. ლავროვი აშშ-ის მიერ სანქცირებულთა შორისაა, თუმცა, როცა საქმე ეხება გაეროს, მას შეერთებული შტატების ტერიტორიაზე შესვლას არ უკრძალავენ, რადგან ამ შემთხვევაში ითვლება გაეროს და არა ოფიციალური ვაშინგტონის სტუმრად. ...