უფრო ზუსტად: ცენტრის გახსნასთან დაკავშირებული საკონსულტაციო მომსახურება - 120 000 ევრო; 2,5-წლიანი ლიცენზია - 1 375 000 ევრო (წელიწადში 275 000 ევრო); საქართველოს კანონმდებლობით გათვალისწინებული გადასახადები - 269 100 ევრო. „თავდაპირველად ცენტრი გაიხსნება ქუთაისის ტექნოლოგიურ ჰაბში, რომელიც წარმოადგენს სტრატეგიულ პროექტს ქვეყნისთვის და სადაც მნიშვნელოვანია საერთაშორისო IT სკოლის/სასწავლო ცენტრის არსებობა. როდესაც ცენტრი სრული დატვირთვით ამუშავდება, მას საშუალება ექნება 1,000-მდე სტუდენტი მიიღოს და შესთავაზოს ზემოთ აღნიშნული კურსები ქართულ ენაზე, უამრავ სახალისო და შემეცნებით აქტივობასთან ერთად. კურსები მუდმივ რეჟიმში განახლდება, რათა თანხვედრაში იყოს ბაზარზე არსებულ ტექნოლოგიურ სიახლეებთან. ცენტრში დასაქმებული პერსონალი კი ყოველ 6 თვეში ერთხელ გაივლის გადამზადების პროგრამას, რაც უზრუნველყოფს მაღალი ხარისხის სწავლებას“, - წერია ინოვაციების და ტექნოლოგიების სააგენტოს მიერ შესყიდვების სააგენტოსთვის მიწოდებულ ინფორმაციაში. სააგენტო მომსახურების ტენდერის გარეშე, პირდაპირი წესით შესყიდვაზე ნებართვას ითხოვს. საქართველოს მთავრობა ქუთაისში, პარლამენტის ყოფილ შენობაში, ტექნოლოგიური ჰაბის გახსნას 2025 წლისთვის აპირებს. ამისთვის ეკონომიკის სამინისტროს ბიუჯეტიდან 12 მილიონი ლარი უნდა გამოიყოს ორი წლის განმავლობაში - განკარგულება 1 აგვისტოს გამოიცა. საქართველოში IT ჰაბის გახსნაზე ჯერ კიდევ 2022 წლის დეკემბერში ისაუბრა მაშინდელმა პრემიერ-მინისტრმა ირაკლი ღარიბაშვილმა. „ვემუშავებით ერთ-ერთ ებრაულ კომპანიას, რომელიც გამოთქვამს სურვილს, რომ ქუთაისის პარლამენტის შენობის ბაზაზე შეიქმნას ახალი IT ჰაბი და არა მხოლოდ, ტექნოლოგიური ჰაბი, რომელიც მოიზიდავს, დაასაქმებს IT-ის სფეროში მომუშავე ახალგაზრდებს, ჩვენს ქართველ სტუდენტებს, ახალგაზრდებს ხელს შეუწყობს განვითარებაში და აქაც რამდენიმე ათეული მლნ დოლარის ინვესტიცია განხორციელდება“, - თქვა ღარიბაშვილმა 2022 წელს. ასევე ნახეთ პრემიერის თქმით, საუბარია საქართველოში "IT ჰაბის", აეროპორტებისა და პორტების განვითარებაზე პარლამენტის ყოფილი შენობა ქუთაისში წლებია უფუნქციოდაა. გამჭვირვალე შენობა მიხეილ სააკაშვილის პრეზიდენტობის დროს აშენდა. ამ შენობაში სრულყოფილად მხოლოდ 2012 წლის მოწვევის პარლამენტმა იმუშავა, შემდეგ კი საკანონმდებლო ორგანომ მუშაობა გააგრძელა მხოლოდ თბილისში, რუსთაველის გამზირზე მდებარე შენობაში. ...