საქართველოს პრეზიდენტი სალომე ზურაბიშვილი გერმანიის ფედერაციული რესპუბლიკის პრეზიდენტს, ფრანკ-ვალტერ შტაინმაიერს ტელეფონით ესაუბრა. საუბარი პირველ ნოემბერს შედგა. ინფორმაცია საქართველოს პრეზიდენტის ადმინისტრაციამ გაავრცელა, თუმცა არ დაუზუსტებიათ, რა საკითხები განიხილეს სატელეფონო საუბარში. რამდენიმე დღით ადრე პრეზიდენტმა ზურაბიშვილმა განაცხადა, რომ არ აღიარებს საპარლამენტო არჩევნების შედეგებს. გერმანიის ელჩმა პეტერ ფიშერმა 26 ოქტომბრის საპარლამენტო არჩევნებთან დაკავშირებით განაცხადა: „საქართველო უკან მიიწევს. უპრეცედენტოა უკუსვლა სამართლის და ფუნდამენტური უფლებების მხრივ. არჩევნები არ შეესაბამება იმ სტანდარტს, რასაც [ევროკავშირის] კანდიდატისგან ელიან. ევროკავშირის ლიდერები მალე შეხვდებიან, რათა შედეგებზე იმსჯელონ“, - დაწერა გერმანელმა დიპლომატმა. 26 ოქტომბრის არჩევნების ოფიციალური შედეგებით, პირველ ადგილზე ხმების თითქმის 54%-ით „ქართული ოცნებაა“, ხმები კი ასე გადანაწილდა: „ქართული ოცნება“ - 53.931%; "კოალიცია ცვლილებისთვის" - 11.035%; "ერთიანობა - ნაციონალური მოძრაობა" - 10.167%; "ძლიერი საქართველო" - 8.81%; "გახარია საქართველოსთვის" - 7.768%. ოპოზიციური პარტიები არჩევნების შედეგებს გაყალბებულად მიიჩნევენ და ითხოვენ ახალ არჩევნებს, რომელსაც საერთაშორისო საარჩევნო ადმინისტრაცია ჩაატარებს. არჩევნებს გაყალბებულად მიიჩნევს პრეზიდენტი სალომე ზურაბიშვილიც. 26 ოქტომბრის საპარლამენტო არჩევნებს კრიტიკული საერთაშორისო გამოხმაურება მოჰყვა. დასავლელი ლიდერები არჩევნების შეფასებისას იშველიებენ დამკვირვებლების დასკვნებს, რომლებშიც საუბარია იმ დარღვევებზე, რომლებიც ახლდა წინასაარჩევნო პერიოდსა და არჩევნების დღეს. მარკერის კვალი ბიულეტენის მეორე გვერდზეც ჩანდა, რის გამოც ხმის ფარულობა მასობრივად დაირღვა, - აცხადებენ ოპოზიციური პარტიები, დამკვირვებლები და ამომრჩევლები. საია ყველა იმ საარჩევნო უბნის შედეგების ბათილად ცნობას ითხოვს, სადაც არჩევნები ელექტრონული სისტემით ჩატარდა. ასევე ნახეთ "საქართველო ევროპულ გზაზე წინ არ მიდის" - ევროპელმა ელჩებმა "ქართულ ოცნებას" უპასუხეს ...