მოლდოვაში საპრეზიდენტო არჩევნებში გაიმარჯვა ქვეყნის მოქმედმა პრეზიდენტმა, პროევროპელმა მაია სანდუმ. მან ხმების 54,91% მიიღო, მისმა მეტოქემ, ყოფილმა გენერალურმა პროკურორმა ალექსანდრ სტოიანოგლუმ, რომელსაც პრორუსული „მოლდოვის სოციალისტური პარტია“ უჭერს მხარს, 45,09%. მოლდოვაში საარჩევნო უბნების დახურვის შემდეგ დაფიქსირდა 54,07% აქტივობა, რაც პირველ ტურზე მეტია. აღინიშნა, რომ კენჭისყრა გრძელდება საზღვარგარეთ საარჩევნო უბნებზე, ასევე ზოგიერთ პუნქტში თავად მოლდოვაში. 3 ნოემბერს გაიმართა არჩევნების მეორე ტური, ხოლო პირველი ტური, რომელშიც ვერცერთმა კანდიდატმა ვერ დააგროვა 50%-ზე მეტი, 20 ოქტომბერს შედგა. პირველ ტურში პირველ ადგილზე გავიდა მაია სანდუ, მან ხმების 42% მოაგროვა. მეორე ადგილზე 26%-ით გავიდა ალექსანდრ სტოიანოგლუ და, საარჩევნო კანონის მიხედვით, დაინიშნა მეორე ტური, რომელშიც ეს ორი კანდიდატი დაუპირისპირდა ერთმანეთს. მაია სანდუმ მადლობა გადაუხადა ამომრჩევლებს აქტიური მონაწილეობისთვის და, სხვა საკითხებთან ერთად, ხაზგასმით აღნიშნა კიშინიოვში კარგი აქტივობა და მოლდოველი ამომრჩევლის „განსაკუთრებული მობილიზაცია“ საზღვარგარეთ. მანამდე მიიღეს ინფორმაცია, რომ საღამოს რვა საათისთვის კიშინიოვში 300 ათასზე მეტმა მოლდოველმა მისცა ხმა საზღვარგარეთ, რასაც მოლდოვის რესპუბლიკის ისტორიაში აბსოლუტური რეკორდი უწოდეს. კენჭისყრის დღეს, 3 ნოემბერს, მოლდოვის ხელმძღვანელობამ მოსკოვის წინააღმდეგ გამოთქვა ახალი ბრალდებები არჩევნებში ჩარევის შესახებ. კერძოდ, კომენტარი გააკეთა მოლდოვის მოქმედი პრეზიდენტის მრჩეველმა ეროვნული უსაფრთხოების საკითხებში, სტანისლავ სეკრიერუმ. მან ხმის მიცემის პროცესში რუსეთის მხრიდან ფართომასშტაბიანი ჩარევის შესახებ ილაპარაკა. „ეს არის არჩევნების შედეგების დამახინჯების პოტენციური მცდელობა“, - წერს სეკრიერუ პლატფორმა X-ზე. მოსკოვმა არაერთხელ უარყო მსგავსი ბრალდებები. ადამიანის უფლებათა დაცვის მისიის, Promo-LEX-ის დამკვირვებლებმა, რომელთა დასკვნებს იმოწმებს რადიო თავისუფლების მოლდოვური სამსახური, 3 ნოემბრის საღამოს განაცხადეს, რომ მათ დააფიქსირეს 220-ზე მეტი შეტყობინება დარღვევების შესახებ. იმ მომენტისთვის პოლიციის მონაცემები 190-ზე მეტ დარღვევაზე მიუთითებდა. Promo-LEX-ის მიერ დაფიქსირებული დარღვევების უმეტესობა ეხებოდა კენჭისყრის ფარულობას, როგორიცაა ბიულეტენის გადაღება და საარჩევნო უბნებზე ამომრჩეველთა რეგისტრაციის სისტემების ფუნქციონირების ხარვეზები, რომელთა როლი არის მრავალჯერადი ხმის მიცემის შემთხვევების თავიდან აცილება. მიმდინარეობს ახალი ამბის განახლება. ასევე ნახეთ მოლდოვამ საპრეზიდენტო არჩევნებში "მასშტაბური ჩარევის" შესახებ განაცხადა ...