ამერიკის შეერთებული შტატების პრეზიდენტობის დემოკრატმა კანდიდატმა, მოქმედმა ვიცე-პრეზიდენტმა კამალა ჰარისმა ხმის წინასწარ მიცემის უფლებით ისარგებლა. 3 ნოემბერს მიჩიგანის შტატში მყოფმა ჰარისმა ჟურნალისტებს დაუდასტურა, რომ შევსებული საარჩევნო ბიულეტენი ფოსტით გაგზავნა თავის მშობლიურ კალიფორნიის შტატში. შეერთებულ შტატებში საპრეზიდენტო არჩევნების ძირითად დღემდე, 5 ნოემბრამდე, კენჭისყრაში წინასწარ მონაწილეობის უფლებით უკვე 25 მილიონზე მეტმა ამერიკელმა ისარგებლა. ნაწილმა ბიულეტენი ფოსტით გაგზავნა, ნაწილმა კი ხმა მისცა წინასწარი კენჭისყრის უბნებზე. მიჩიგანში საარჩევნო მიტინგზე გამოსვლისას ჰარისმა განაცხადა, რომ 5 ნოემბერს ერთ-ერთი ყველაზე მნიშვნელოვანი არჩევნები ჩატარდება და ამერიკელებს კენჭისყრაში მონაწილეობისკენ მოუწოდა. კამალა ჰარისის განცხადებით, ქვეყანაში ახალი თაობის ლიდერების დრო დადგა. ასევე ნახეთ ჰარისი ან ტრამპი: რას ნიშნავს ეს უკრაინისთვის? საპრეზიდენტო არჩევნებში კამალა ჰარისის მეტოქეა ყოფილი პრეზიდენტი, რესპუბლიკელი დონალდ ტრამპი. მან კენჭისყრის ძირითად დღემდე შემაჯამებელი მიტინგების ადგილად შეარჩია პენსილვანია, ჩრდილოეთ კაროლინა და ჯორჯია. ამერიკული მედიის ცნობით, პენსილვანიაში გამოსვლისას ტრამპმა განაცხადა, რომ 2020 წლის საპრეზიდენტო არჩევნების შემდეგ, რომლის შედეგები არ აღიარა, თეთრი სახლი არ უნდა დაეტოვებინა. მილიარდერი ბიზნესმენი დონალდ ტრამპი აშშ-ის პრეზიდენტი იყო 2017 წლის 20 იანვრიდან 2021 წლის 20 იანვრამდე. 2020 წლის ნოემბრის არჩევნებში მეორე ვადით კენჭისყრისას ტრამპი დამარცხდა დემოკრატ ჯო ბაიდენთან, თუმცა მარცხს არ აღიარებდა და აცხადებდა, რომ არჩევნები გაყალბდა. 2021 წლის 6 იანვარს, ჯო ბაიდენის ინაუგურაციამდე დაახლოებით ორი კვირით ადრე, დონალდ ტრამპის მხარდამჭერები კაპიტოლიუმის შენობაში შეიჭრნენ და მოითხოვდნენ, რომ კონგრესს არ ეღიარებინა საპრეზიდენტო არჩევნებში ჯო ბაიდენის გამარჯვება. მასობრივი არეულობების შედეგად დაიღუპა ხუთი ადამიანი, მათ შორის პოლიციელი. კაპიტოლიუმზე თავდასხმის გამო ბრალდებულია 1000-ზე მეტი პირი. საქმე აღძრულია ტრამპის წინააღმდეგაც. ...