თბილისის მერიის პრესსამსახურში რადიო თავისუფლებას უთხრეს, რომ დედაქალაქის ყოფილ მერს, გიგი უგულავას, ავტობუსით „უბილეთოდ მგზავრობისთვის“ ჯარიმა შეცდომით გამოუწერეს. მერიის ცნობით, ამ დროისთვის უგულავას მოეხსნა ჯარიმასთან დაკავშირებული ყველა შეზღუდვა. თბილისის მერიაში უგულავას სახელზე ჯარიმის შეცდომით გამოწერის მიზეზი განმარტეს. „აღნიშნული ჯარიმა გამოწერილია შეცდომით. უბილეთო მგზავრობას ადგილი ჰქონდა სხვა პიროვნების მხრიდან და იდენტიფიცირების დროს დაფიქსირდა ხარვეზი. აღნიშნული მოქალაქის სახელი, გვარი, დაბადების წელი და რეგისტრაციის ადგილი არის იდენტური. პიროვნების იდენტიფიცირებასთან დაკავშირებით სხვა დროსაც დაფიქსირდა ორიოდე შემთხვევა, თუმცა მოქალაქის მომართვის საფუძველზე, მოხდა დაუყოვნებლივი რეაგირება. მოცემულ შემთხვევაშიც ჯარიმა და მასთან დაკავშირებული ყველა შეზღუდვა, რაც დაედო მოქალაქეს, მოხსნილია“, - მოგვწერეს თბილისის მერიიდან. три გიგი უგულავამ 4 ნოემბერს ფეისბუკის ოფიციალურ გვერდზე დაწერა, რომ „ავტობუსით უბილეთოდ მგზავრობის“ გამო დააყადაღეს. უგულავას განცხადებით, მას ავტობუსით არ უმგზავრია და მის სახელზე ჯარიმა შეცდომით გამოწერეს. „ახლა ბანკიდან შემატყობინეს რომ ანგარიშზე მადევს ყადაღა. გაირკვა რომ მერიისგანაა, მეტიც ჯარიმა ადმინისტრაციულის 130 მუხლის 4-ე პუნქტია. მედავებიან რომ 24 აგვისტოს ვაზისუბანში ავტობუსით უბილეთოდ ვიმგზავრე. მერიის ცხელი ხაზი იძახის გაასაჩივრეთო. გასაგებია რომ შეცდომაა. არც უბილეთოდ და არც ბილეთიანად მე ვაზისუბანში ავტობუსით არ მიმგზავრია. ახლა მე უნდა ვირბინო ამათ სისულელეზე. მეტი საქმე არ მაქვს. დასანანია რომ ერთ დიდ საბრიყვეთად აქციეთ ჩემი საყვარელი მერია“, - დაწერა უგულავამ. გიგი უგულავა 2005-2013 წლებში იკავებდა თბილისის მერის თანამდებობას. ...