უკრაინის პრეზიდენტის ინფორმაციით, რუსეთის კურსკის ოლქში უკვე იმყოფება ჩრდილოეთ კორეის არმიის 11 ათასი სამხედრო. ეს რიცხვი ვოლოდიმირ ზელენსკიმ დაასახელა 4 ნოემბერს, ღამით უკრაინელებისადმი ვიდეომიმართვისას, რომელსაც წინ უძღოდა მისი შეხვედრა თავდაცვის სამინისტროს დაზვერვის მთავარი სამმართველოს და საგარეო დაზვერვის სამსახურის ხელმძღვანელებთან. ზელენსკის განცხადებით, ხედავენ, რომ ჩრდილოკორეელი სამხედროების რაოდენობა იზრდება, მაგრამ სამწუხაროდ, არ იზრდება პარტნიორების რეაქცია. უკრაინის თავდაცვის ძალებმა რუსეთის კურსკის ოლქში, რომელიც უკრაინის სუმის ოლქს ესაზღვრება, 2024 წლის აგვისტოდან დაიწყეს სახმელეთო ოპერაცია, რომლის მიზნად გამოცხადდა უსაფრთხოების ზონის შექმნა უკრაინის სასაზღვრო რაიონების დასაცავად. პირველი ცნობები, რომ რუსეთი უკრაინის წინააღმდეგ ომში ჩრდილოეთ კორეის არმიის ათასობით სამხედროს გამოიყენებს, 2024 წლის ოქტომბერში გაავრცელეს სამხრეთ კორეის და უკრაინის სპეცსამსახურებმა და მოგვიანებით დაადასტურეს დასავლეთის სახელმწიფოებმა, რომლებმაც ეს ფაქტი სერიოზულ ესკალაციად შეაფასეს და რუსეთი მოსალოდნელი შედეგების შესახებ გააფრთხილეს. ასევე ნახეთ აშშ: კურსკში მყოფი ჩრდილოეთ კორეის 8000 სამხედრო მზადაა ბრძოლისთვის ასევე ნახეთ ჩრდილოეთ კორეის ჯარისკაცები "ნებადართული სამიზნეა" რუსეთის ომში უკრაინის წინააღმდეგ 31 ოქტომბერს, სამხრეთ კორეის ტელეკომპანია KBS-თან ინტერვიუში პრეზიდენტმა ზელენსკიმ განაცხადა, რომ ჩრდილოეთ კორეის არმიის სამხედროების გარკვეული ნაწილის გამოყენებით პუტინი აპირებს გამოცადოს მსოფლიოს რეაქცია, რომლის მიხედვით კონტინგენტის გაზრდას გადაწყვეტს. ამ ეტაპზე არსებულ რეაქციას ზელენსკიმ „ნულოვანი“ უწოდა. რუსეთის ხელისუფლება ქვეყნის ტერიტორიაზე ჩრდილოეთ კორეის არმიის სამხედროების ყოფნას არ უარყოფს, თუმცა უკრაინის წინააღმდეგ მათ გამოყენებაზე კომენტარს არ აკეთებს. ასევე ნახეთ ინტერაქტიური რუკა: უკრაინის ჯარების შესვლა კურსკის ოლქში ...