ევროპელი პოლიტიკოსები აღნიშნავენ, რომ სერიოზული ბრალდებების ფონზე, "მხოლოდ დამოუკიდებელ საერთაშორისო მოკვლევას" შეუძლია გამოძიება. მათ ასევე მოითხოვეს, გასაჯაროვდეს ამომრჩევლების პროტოკოლი, რათა ყველა ამომრჩეველმა შეძლოს გადაამოწმოს, მართებულია თუ არა მათ მიერ ხმის მიცემის დრო და ადგილი. გარდა ამისა, ევროპელი პარლამენტარები საქართველოს მთავრობისგან მოითხოვენ, გააუქმონ კანონები, "რომლებიც ეწინააღმდეგება ევროკავშირის სადამფუძნებლო ღირებულებებსა და პრინციპებს". განცხადების ავტორები ევროკავშირს და აშშ-ს მოუწოდებენ, დაუწესონ სანქციები ქართველ მაღალჩინოსნებს, მათ შორის, ბიძინა ივანიშვილს. ევროპელი პარლამენტარების კიდევ ერთი მოთხოვნა საქართველოს სამთავრობო უწყებებისთვის ევროკავშირის დახმარების შეჩერებას უკავშირდება. ამის საპირწონედ, ისინი გამოდიან ინიციატივით, გაიზარდოს საქართველოში სამოქალაქო საზოგადოებისა და დამოუკიდებელი მედიის დაფინანსება. განცხადებაში საუბარია საქართველოსთვის ევროკავშირთან უვიზო რეჟიმის შეჩერებაზეც. ავტორები წერენ: "მოვუწოდებთ ევროკომისიას და ევროკავშირის საბჭოს, გადასინჯოს საქართველოსთან სავიზო ლიბერალიზაციის რეჟიმი, ზემოჩამოთვლილი პირობების შეუსრულებლობის შემთხვევაში მისი სრული შეჩერების გარეშე". განცხადებას ხელს აწერენ ავსტრიელი, ბელგიელი, ჩეხი, ესტონელი, ფინელი, ფრანგი, ირლანდიელი, იტალიელი, ლატვიელი, ლიეტუველი, ლუქსემბურგელი, ნიდერლანდელი, მოლდოველი, პოლონელი, ესპანელი, შვედი და უკრაინელი პარლამენტარები. ასევე ევროპარლამენტარები: რასა იუკნევიჩიანე, რაფაელ გლუკსმანი და რიჰარდს კოლსი. ცესკოს წინასწარი მონაცემებით, "ქართული ოცნება" ხელისუფლებაში რჩება მეოთხე ვადით. საქართველოს პროკურატურამ საპარლამენტო არჩევნების სავარაუდო გაყალბების ფაქტზე გამოძიება ცენტრალური საარჩევნო კომისიის მიმართვის საფუძველზე დაიწყო. ამ საქმეზე გამოკითხვაზე დაიბარეს პრეზიდენტი და ოპოზიციონერი ლიდერებიც. ...