საქართველოს შესახებ საუბარი არ ყოფილა არც შეხვედრის შემდეგ გამართულ პრესკონფერენციაზე, სადაც გამოვიდნენ ევროპული საბჭოს პრეზიდენტი შარლ მიშელი, ევროკომისიის პრეზიდენტი ურზულა ფონ დერ ლაიენი და უნგრეთის პრემიერ-მინისტრი ვიქტორ ორბანი. უნგრეთი ამჟამად ევროკავშირის საბჭოს მორიგე პრეზიდენტი ქვეყანაა. სწორედ უნგრეთის დედაქალაქი ბუდაპეშტი მასპინძლობდა შვიდ ნოემბერს ევროპული თანამეგობრობის სამიტს, სადაც ირაკლი კობახიძეც მონაწილეობდა, და ევროკავშირის ქვეყნების ლიდერების შეხვედრასაც, რომელიც რვა ნოემბერს გაიმართა. ასევე ნახეთ ევროპის პოლიტიკური გაერთიანების "თამაში" პუშკაშის მოედანზე კვირებით ადრე იყო ცნობილი, რომ ევროპულ საბჭოს საქართველოზე უნდა ემსჯელა. ამის შესახებ საბჭოს პრეზიდენტი, შარლ მიშელიც წერდა ექვს ნოემბერს, საბჭოს წევრებისთვის გაგზავნილ საჯარო მოწვევაში. როგორც ჩანს, საქართველოს საკითხის განხილვას ევროკავშირის საგარეო საქმეთა მინისტრების საბჭო გადაიბარებს. ისინი 18 ნოემბერს ბრიუსელში შეიკრიბებიან. დღეის მდგომარეობით, საქართველო დღის წესრიგში მეორე საკითხია უკრაინის შემდეგ. „სერიოზული ეჭვები გაყალბებაზე“ საქართველოს შესახებ დასმულ კითხვას რვა ნოემბრის დილით უპასუხა შარლ მიშელმა. ევროპული საბჭოს პრეზიდენტმა, რომელსაც სულ მალე ამ თანამდებობაზე პორტუგალიელი ანტონიო კოშტა ჩაანაცვლებს, საქართველოში ჩატარებული არჩევნების შესახებ „სერიოზულ ეჭვებზე“ ისაუბრა: „არსებობს ეჭვები. გაყალბების სერიოზული ეჭვებია და ამას სერიოზული გამოძიება სჭირდება. ამ პროცესთან დაკავშირებით სიცხადე გვჭირდება, რათა დავრწმუნდეთ, რომ ყველაფერი სამართლიანად და გამჭვირვალედ გაკეთდა. ამასთან დაკავშირებით ეჭვები არა მხოლოდ ევროპაში, არამედ მსოფლიოს სხვა ქვეყნებშიცაა“, - თქვა შარლ მიშელმა. შარლ მიშელისა და ირაკლი კობახიძის შეხვედრა ბუდაპეშტში წინა დღეს შარლ მიშელი საქართველოს პრემიერ-მინისტრს, ირაკლი კობახიძეს შეხვდა. ევროკავშირისა და საქართველოს უმაღლესი თანამდებობის პირებს შორის ეს პირველი შეხვედრა იყო მას შემდეგ, რაც ივნისში ევროკავშირმა საქართველოს ხელისუფლების წარმომადგენლებთან უმაღლესი დონის ვიზიტები შეწყვიტა. „ყველაფერთან დაკავშირებით მქონდა საუბარი შარლ მიშელთან, განმარტებები გავუკეთე, მან მოისმინა და ალბათ გამოიტანს დასკვნას“, - ასე აღწერა მოგვიანებით ირაკლი კობახიძემ ევროპული საბჭოს პრეზიდენტთან შეხვედრა. ასევე ნახეთ "მიშელს შეხვედრაზე ვუთხარი, რომ ოპოზიციას არ აქვს სახალხო მხარდაჭერა" - კობახიძე რვა ნოემბერს მიცემულ კომენტარში საქართველოს პრემიერ-მინისტრთან შეხვედრას შარლ მიშელი მოკლედ გამოეხმაურა და თქვა, რომ კობახიძეს არჩევნების გაყალბების შესახებ არსებულ ეჭვებზე „შეხედულებები გაუზიარა“. რადიო თავისუფლების ინ...