დიდი ბრიტანეთის პრემიერ-მინისტრი კირ სტარმერი და საფრანგეთის პრეზიდენტი ემანუელ მაკრონი „უკანასკნელად“ შეეცდებიან დაარწმუნონ აშშ-ის პრეზიდენტი ჯო ბაიდენი, ნება დართოს უკრაინას, Storm Shadow-ის ტიპის რაკეტებით დაარტყას რუსეთის სიღრმეში არსებულ სამიზნეებს. ამის შესახებ The Telegraph-ი წერს. მოელიან ასევე, რომ სტარმერი და მაკრონი შეეცდებიან, ხელი შეუშალონ აშშ-ის პრეზიდენტად არჩეულ დონალდ ტრამპის სწრაფვას, შეუმციროს მხარდაჭერა უკრაინას აშშ-ის მხრიდან. გაზეთის ცნობით, ამის შესახებ მაკრონი და სტარმერი 11 ნოემბერს პარიზში იმსჯელებენ. ბრიტანელი ოფიციალური პირები იმედოვნებენ, რომ ბაიდენი, რომელიც ცდილობს თავისი საგარეო პოლიტიკური მემკვიდრეობის განმტკიცებას, საბოლოოდ გასცემს ნებართვას, რომელსაც კიევი თვეების განმავალობაში ესწრაფოდა. უკრაინის ხელისუფლებას მიაჩნია, რომ რუსეთის ტერიტორიის სიღრმეში იერიშებისთვის შორი დისტანციის რაკეტების გამოყენება ომის მიმდინარეობის შეცვლას შეუწყობს ხელს. თავისი წინასაარჩევნო კამპანიის განმავალობაში ტრამპი აცხადებდა, რომ უკრაინაში ომს "პირველ დღეს დაასრულებდა. გაჩნდა შეშფოთება, რომ ის აიძულებს უკრაინას, დათმოს ტერიტორიები, რომლებიც რუსეთმა დაიკავა", - წერს The Telegraph-ი. უკრაინის პრეზიდენტი ვოლოდიმირ ზელენსკი აცხადებს, რომ რუსეთისთვის დათმობას არ აპირებს. ასევე ნახეთ ტრამპმა შეიძლება წინადადება წამოაყენოს, რუსეთსა და უკრაინას შორის ბუფერული ზონის შექმნაზე ...