თევზაძის თქმით, მან გამომძიებლებს აუხსნა, როგორ გაყალბდა არჩევნები: „გამოძიება არ არის მოტივირებული, რომ რეალური შესაძლო პირები [დასაჯოს]". საბა ბუაძემ კი აღნიშნა, რომ პოლიტიკური მოტივებით შედგენილი კითხვები დაუსვეს, მან კი არჩევნების გაყალბების მტკიცებულებად წარადგინა ვიდეომასალა, რომელშიც ქალი თავისი გარდაცვლილი შვილის საარჩევნო სიაში ყოფნაზე საუბრობს. „პროკურატურა არ აწარმოებს გამოძიებას ზეგავლენაზე, არჩევნების ფარულობის დარღვევაზე...“ - თქვა საბა ბუაძემ. ოპოზიციურმა პარტიებმა და საქართველოს პრეზიდენტმა საპარლამენტო არჩევნების შედეგი გაყალბებულად გამოაცხადეს, არ აღიარეს და მოითხოვეს ახალი არჩევნები, რომელსაც ჩაატარებს საერთაშორისო საარჩევნო ადმინისტრაცია. ამ არჩევნებზე მოსახლეობის 90-მა პროცენტმა ხმა ელექტრონული სისტემების გამოყენებით მისცა. ცესკოს წინასწარი მონაცემებით, „ქართული ოცნება“ ხელისუფლებაში რჩება მეოთხე ვადით. საქართველოს პროკურატურამ საპარლამენტო არჩევნების სავარაუდო გაყალბების ფაქტზე გამოძიება ცენტრალური საარჩევნო კომისიის მიმართვის საფუძველზე დაიწყო. ამ საქმეზე მოსამართლის თანდასწრებით გამოჰკითხეს რამდენიმე სხვა ოპოზიციონერი პოლიტიკოსიც და არასამთავრობო ორგანიზაციის წარმომადგენელი. ...