რუსეთში ნოვოსიბირსკის საქალაქო საბჭომ ორ დამოუკიდებელ დეპუტატს, სვეტლანა კავერზინას და ანტონ კარტავინს, მანდატები ჩამოართვა "უცხოეთის აგენტის" სტატუსის გამო. ამ ცნობას ტელეგრამის არხი "სიბირსკი ექსპრესი" ავრცელებს. გადაწყვეტილებას მხარი დაუჭირა 39-მა დეპუტატმა, ორს კენჭისყრაში მონაწილეობა არ მიუღია. ოქტომბრის ბოლოს ნოვოსიბირსკის საბჭომ ქალაქის წესდებაში შეიტანა ცვლილებები, რომლებიც შესაძლებელს ხდის რუსეთის ხელისუფლების მიერ "უცხოეთის აგენტებად" მიჩნეული პირებისთვის დეპუტატის უფლებამოსილების შეწყვეტას. შესწორებები შეიტანეს ფედერალური კანონის დაცვის საბაბით - ეს კანონი "უცხოეთის აგენტებს" უკრძალავს არჩევნებში კანდიდატად მონაწილეობას. შესწორებების წინააღმდეგ ხმა მისცეს მხოლოდ თავად კარტავინმა და კავერზინამ, სამმა დეპუტატმა კენჭისყრაში მონაწილეობა არ მიიღო. ნოვოსიბირსკში მანამდე გამართული განხილვების მონაწილეთა უმრავლესობა შესწორებების წინააღმდეგ გამოდიოდა. კარტავინი იუსტიციის სამინისტრომ "უცხოეთის აგენტად" 2024 წლის თებერვალში გამოაცხადა, კავერზინა - ერთი თვის შემდეგ. უწყებამ მათ უცხოეთიდან დაფინანსების მიღება ვერ აღმოუჩინა და მიზეზად მოიტანა კომენტარები, რომლებიც დეპუტატებმა "უცხოეთის აგენტ მედიასაშუალებებს" მისცეს. ასევე ნახეთ როგორ გახდა მასწავლებელი რუსეთში უცხოეთის აგენტი - ინტერვიუ დარია აპახონჩიჩთან რუსეთის ხელისუფლებას შეუძლია "უცხოეთის აგენტად" გამოაცხადოს ნებისმიერი პირი, რომელიც არის "უცხოეთის გავლენის" ქვეშ - ხოლო ეს გავლენა კანონში ბუნდოვნადაა განმარტებული. ამ ეტაპზე რეესტრში 600-ზე მეტი "უცხოეთის აგენტია", მათ შორის ფიზიკური პირები, მედიასაშუალებები, არაკომერციული ორგანიზაციები და მოძრაობები. "უცხოეთის აგენტის" სტატუსი სხვა საკითხებს შორის ითვალისწინებს ყოველკვარტალურ ანგარიშს პირად ანგარიშებზე თანხების მოძრაობის შესახებ და ყველა საჯარო განცხადების მარკირებას. ანგარიშში შეცდომების ან მარკირების არდატანის გამო გათვალისწინებულია სასჯელი, თავისუფლების აღკვეთის ჩათვლით. "უცხოეთის აგენტებს" ეკრძალებათ საკუთარი კანდიდატურის დაყენება არჩევნებზე, საარჩევნო კომისიების წევრობა, არჩევნებზე დამკვირვებლად ყოფნა, სახელმწიფო სასწავლებლებში მასწავლებლად მუშაობა, საჯარო ღონისძიებების ორგანიზატორობა და კონტრაქტით სამსახური არმიაში. ამჟამად რუსეთის ხელისუფლება მუშაობს დამატებითი უფლებრივი შეზღუდვების შემოტანაზე "უცხოეთის აგენტებისთვის". ასევე ნახეთ რუსეთმა ლიტერატურის კრიტიკოსი და აქტივისტები შეიყვანა "უცხოეთის აგენტების" სიაში ...